Aktuale, Lajme

Letra e BE-së për takimet me Kurtin, analisti ua prish llogaritë opozitës ‘zbulon’ prapaskenat: Nuk e dëmtojnë politikisht

Posted on by botaelajmeve

Mediat kanë raportuar ditë më parë për një letër që zyra e BE-së, i ka drejtuar Qeverisë së Kosovës, se zyrtarët e lartë të saj dhe të shteteve anëtare nuk do të mbajnë takime brenda ndërtesës së Qeverisë së Kosovës me kryeministrin Albin Kurti.

Sipas raportimeve, përveç Kurtit këta zyrtarë të lartë s’do të takojnë as ministrat në detyrë brenda ndërtesës së Qeverisë, derisa të ketë një qeveri të re me mandat të plotë.

”Në interes të qëndrueshmërisë institucionale dhe respektimit të sundimit të ligjit, vizitorët e nivelit të lartë nga Shtetet Anëtare të BE-së dhe institucionet e BE-së do të përmbahen, përkohësisht, nga mbajtja e takimeve me Kryeministrin në detyrë dhe ministrat brenda ndërtesës së Qeverisë së Kosovës, derisa të jetë në funksion një Qeveri me mandat të plotë”, thuhet në letrën e publikuar nga media dhe që mban nënshkrimin e Aivo Orav.

Kësaj i janë kundërpërgjigjur zyrtarë të qeverisë së Kosovës, të cilët thanë se Kryeministria është vendi i punës i kryeministrit në detyrë, Albin Kurti kushdo që dëshiron të takojë atë.

“Kushdo që kërkon takim me kryeministrin në detyrë të Republikës së Kosovës, duhet të vijë në vendin ku punon kryeministri në detyrë i Republikës së Kosovës. Gjithsesi kjo nuk do të thotë që nuk mban takime pune edhe jashtë zyrës së tij, por për këtë duhet të ketë dakordim të palëve”, theksoi zëdhënësi Kryeziu, duke shtuar se takime jashtë mjediseve të Kryeministrisë kanë ndodhur edhe në të kaluarën gjatë kohës sa Kurti ka qenë kryeministër me mandat të plotë.

Analisti Afrim Kasolli, në një prononcim për gazetën “Bota sot”, thotë se politikisht kjo nuk e dëmton në masë të madhe Kurti, ashtu sikur shpresojnë disa.

Sipas Kasollit, Kurti ka arritur të fitojë vota edhe nën masa sanksionuese të vendosura nga BE.

“Pa dyshim, një akt i tillë është në dëm të interesave shtetërore, sepse e thellon izolimin diplomatik të shtetit. Por politikisht, sa i përket ndikimit elektoral, nuk besoj se kumte të tilla mund ta dëmtojnë në masë të madhe Kurtin, siç po shpresojnë disa “eurocentristë kozmopolitë”. Mos ta harrojmë një fakt: Albin Kurti i ka fituar mbi 50 për qind të votave si prijës i kryqëzatës politike, së bashku me Vjosa Osmanin, kundër Shtëpisë së Bardhë – duke u paraqitur si mbrojtës i Kosovës nga copëtimi që, sipas tyre, po gatuhej në Zyrën Ovale. Po ashtu, ai ka arritur t’i fitojë 48 deputetë, ndonëse vendi ka qenë nën masa sanksionuese të vendosura nga BE. E gjithë kjo sepse Kurti ka pasur sukses në amplifikimin e tezës se këto ndëshkime janë pasojë e një kauze të drejtë, që ai po e ndjek në veri. Edhe sot jemi brenda atij narracioni. Vonesat në krijimin e institucioneve janë pasojë e përpjekjeve të Vetëvendosjes për t’ia pamundësuar Listës Serbe qasjen në pushtet – si në nivelin lokal, ashtu edhe në atë qendror. Madje, në këtë aventurë i është bashkuar edhe opozita”, deklaron Kasolli.

Image

Afrim Kasolli

Sipas tij, ka kaluar ajo kohë kur kritikat ndërkombëtare kishin efekt të ndjeshëm elektorial brenda vendit.

“Kosova ka pësuar zhvendosje tektonike politike. Me ndryshimin e gjeneratave, ka kaluar ajo kohë kur kritikat ndërkombëtare kishin efekte të ndjeshme elektorale brenda vendit. Sot, zgjedhjet as nuk fitohen, as nuk humben me këtë kartë. Ndërkohë, për shkak të zvarritjes së gjatë të dialogut ndërmjet Prishtinës dhe Beogradit – të lehtësuar nga Brukseli – në opinionin publik ka zënë gjithnjë e më shumë rrënjë ideja se BE, me qasjen e saj asimetrike, po e mban anën e Serbisë. Pra, janë edhe këto politika të Brukselit që e kanë shtruar terrenin që një pjesë e madhe e qytetarëve të Kosovës sot të jenë shpërfillës ndaj kritikave të tij”, përfundon Kasolli.