Lituania vendos “dhëmbët e dragoit” në kufi me Rusinë

Lituania ka vendosur “dhëmbët e dragoit” – piramida të dizajnuara për të ndaluar tanket – në kufirin me enklavën ruse të Kaliningradit. “Pengesat e vendosura janë vetëm pjesë e një tabloje më të gjerë dhe të integruar,” tha komandanti i ushtrisë lituaneze, Raimundas Vaiksnoras.

Ministria e Mbrojtjes e Lituanisë njoftoi të shtunën se vendosja e “dhëmbëve të dragoit” në kufi me Kaliningradin ka përfunduar. Ky është hapi më i fundit në një seri masash mbrojtëse të ndërmarra nga vendi baltik për të penguar agresionin rus.

“Ne po fillojmë nga niveli taktik — pengesa specifike në kufi — dhe më vonë do ta bashkojmë të gjithë planin inxhinierik në një sistem konceptual,” tha Raimundas Vaiksnoras, komandant i ushtrisë lituaneze.

“Kjo është një masë parandaluese që synon të sigurojë një mbrojtje më efektive,” thuhet në një postim të Ministrisë së Mbrojtjes së Lituanisë në X.

Të tri shtetet baltike, Lituania, Letonia dhe Estonia, janë anëtare të NATO-s dhe kufizohen me Rusinë. Lituania dhe Letonia kufizohen gjithashtu me Bjellorusinë, një aleate e ngushtë e Moskës. Të tria vendet, të cilat më parë ishin të pushtuara nga Bashkimi Sovjetik, kanë rritur gatishmërinë e tyre shtetërore për shkak të kërcënimit të një pushtimi rus që nga shpërthimi i luftës në Ukrainë në vitin 2022.

Ushtria lituaneze po përpiqet të kufizojë mundësinë e përdorimit të rrugëve të papërdorura që lidhin vendin me Rusinë për të zvogëluar rrezikun e një pushtimi tokësor. Gjithashtu, janë ngritur pengesa të reja në pikat kufitare të papërdorura me Bjellorusinë – në Sumskas, Lavoriski, Raigardas dhe Latezeris – si dhe në pikën kufitare Romaniskes me Kaliningradin.

Në korrik, Letonia, nga ana e saj, njoftoi vendosjen e piramidave të betonit kundërtanke përgjatë kufirit me Rusinë.