Mirlind Daku shënoi dy gola, pas ndeshjes u përlot për ndarjen nga jeta të gjyshit

Mirlind Daku vazhdon të jetë prej figurave kryesore në elitën ruse të futbollit. Të shtunën sulmuesi kosovar i shënoi të dy golat në barazimin 2:2 të Rubin Kazanit në udhëtim ndaj Orenburgut. Ndeshja i takoi xhiros së shtatë të kampionatit të Rusisë.

Daku kishte katër ndeshje pa shënuar gol, dy prej tyre kampionale e dy për kupë. Ai së fundi kishte shënuar ndaj CSKA Moskës më 9 gusht. Në fund të korrikut e fillim të gushtit kishte shënuar në katër ndeshje rresht dhe të shtunën sërish ishte efikas.

Reprezentuesi i Shqipërisë tani i ka gjashtë gola në shtatë paraqitje kampionale. E ka edhe një gol në tri paraqitje për Kupë.

Ndeshja e së shtunës ishte emocionale për sulmuesin e fuqishëm.

Të premten ai njoftoi për vdekjen e gjyshit. Golat ndaj Orenburgut ia kushtoi gjyshit të ndjerë. Nën fanellën e Rubin Kazanit ka mbajtur një fanellë me fotografinë e tij dhe të gjyshit, të cilën e shfaqi pas golave të shënuar.

Trajneri i Rubinit, Rashid Rakhimov, është shprehur shumë i kënaqur me Dakun. Ka thënë se ai ka mundur t’i shënojë pesë gola.

“Daku i shënoi dy gola, por ka mundur t’i shënojë pesë. Ai ishte një kundër një në tri raste. Kur gjyshi i Dakut vdiq, e kam pyetur Mirlindin nëse mund të luajë kundër Orenburgut. Daku më tha se ‘nuk do të arrijë për funeral kështu që do të dal në fushë dhe do të luaj për të”, ka treguar Rakhimov.

Daku po ashtu ka folur pas ndeshjes, ndërsa shpërtheu në lot.

“Sot ishte një ndeshje e vështirë për mua. Dje e humba gjyshin dhe ishte e vështirë për mua. Dua t’ia kushtoj golat atij. Pushoftë në paqe”, ka thënë Daku për Match TV.

“Kam pasur lidhje të fortë me të. Të gjithë e kuptojmë që jeta nuk është e përhershme. Por gjëja më e rëndësishme, duke më përfshirë mua, është ta mbaj atë në kujtesë dhe të bëj gjëra të mira në nderim të tij”, ka thënë Daku për “Bussines Online”.

Gjatë verës është përfolur shumë për një largim të Dakut nga Rubin Kazani. Ai megjithatë vazhdoi kontratën, për kushte dukshëm më të mira financiare. Së fundi ka pasur raportime edhe për një kalim te Fiorentina, por kosovari megjithatë pritet të mbetet te Rubin Kazani.

Te kjo skuadër janë edhe Veldin Hoxha, reprezentuesi i ri i Kosovës, si dhe Dardan Shabanhaxhaj. Për Shabanhaxhajn, trajneri Rakhimov ka thënë se luajti ndonëse ishte i sëmurë. Shabanhaxhaj e Daku janë sulmuesit e vetëm në skuadër.