Murati: Nëse opozita s’e voton kryetaren, edhe VV-ja mundet të mos ua votojë nënkryetarët

Deputeti i VV-së, Hekuran Murati, ka thënë se opozita po e bllokon konstituimin e Kuvendit, duke penguar procesin demokratik dhe vonuar formimin e institucioneve të reja, raporton Ekonomia Online.

Murati ka thënë se kjo është “një situatë paradoksale”, sepse nëse opozita s’e voton kryetaren e Kuvendit, edhe VV-ja mundet të mos i votojë nënkryetarët.

Sipas tij, kjo nuk do të duhej të ndodhte sepse “konstituimi i Kuvendit është pluralizëm demokratik”.

“Ka disa kundërthënie dhe disa paradokse në lidhje me opozitën. Janë totalisht të painteresuar për të zbllokuar procesin – edhe e bllokojnë, edhe nuk duan të hapin rrugë. Me votën kundër po e bllokojnë. Po shihet qartë kush po e pengon procesin”.

“Po dalin të pavërteta të gjitha pretendimet që kanë qenë më herët. Është e qartë që opozita po e bllokon procesin. Propozimi ynë është Albulena Haxhiu, dhe hapi që do të ndërmarrim është të bëjmë thirrje që të reflektojnë, njësoj siç ndodhi herën e kaluar. Kryesuesi i seancës besoj që do t’i ftojë përsëri, dhe besoj se do të marrë pjesë edhe LDK-ja, e cila sot nuk ishte e pranishme”,

“Të gjithë pajtohemi që Qeveria duhet të formohet nga shumica parlamentare. Praktika e ka treguar se fituesi i zgjedhjeve tenton ta formojë Qeverinë. Te konstituimi i Kuvendit është pluralizëm demokratik”.