Ndalohen rrjetet sociale për të miturit nën 15 vjeç në Francë

Ligjvënësit francezë kanë miratuar një projektligj që ndalon përdorimin e mediave sociale për fëmijët nën moshën 15 vjeç, i cili pritet të hyjë në fuqi në shtator, në fillim të vitit të ri shkollor.

Masa, e mbështetur fuqimisht nga presidenti Emmanuel Macron, ndalon gjithashtu përdorimin e telefonave celularë në shkollat e mesme dhe është konsideruar si një hap për mbrojtjen e fëmijëve nga efektet e dëmshme të rrjeteve sociale, si ulja e vetëvlerësimit dhe ekspozimi ndaj përmbajtjeve të rrezikshme.

Projektligji është në përputhje me Aktin e Shërbimeve Dixhitale të BE-së dhe vjen në një kohë kur edhe vende të tjera evropiane, si Britania, po shqyrtojnë masa të ngjashme.

Raportet shëndetësore në Francë tregojnë se shumica e adoleshentëve përdorin çdo ditë smartphone për të hyrë në internet, ndërsa disa familje kanë paditur TikTok për raste vetëvrasjesh të lidhura me përmbajtje të dëmshme.

Ndalimi nuk prek platformat edukative apo shkencore, ndërsa shembuj si ai i Australisë, ku rrjetet sociale janë ndaluar për nën 16 vjeç dhe janë mbyllur miliona llogari, tregojnë se kjo është një çështje që po fiton vrull globalisht.