Njerëzit me sy të kaltër kanë një gjë të përbashkët

Njerëzit të cilët kanë sy ngjyrë të kaltër kanë të gjithë një gjë të përbashkët. Sipas “Science Daily”, ata janë të gjithë pasardhësit e një personi të vetëm.

Shkencëtarët në Universitetin e Copenhagen thonë se kanë arritur të zbulojnë mutacionin genetik, përgjegjës për sytë blu, që përllogaritet të ketë ndodhur rreth 6 mijë – 10 mijë vite më parë.

“Dikur të gjithë kishim sy ngjyrë kafe, po një mutacion gjenetik që prek gjenin OCA2 në kromozomet tona çoi në krijimin e një çelësi që ‘fiku’ aftësinë për të prodhuar sy kafe”, shpjegoi për “Science Daily”, profesori Hans Eiberg.

Ky gjen është përgjegjës për proteinën që prodhon melaninën. Është kjo e fundit që i jep ngjyrë flokëve, lëkurës dhe syve.

Njerëzit me sy blu kanë një sasi të vogël melanine në sytë e tyre dhe për shkak të kësaj shkencëtarët konkluduan se ata kanë një paraardhës të përbashkët.