Osmani kërkon heqjen sa më të shpejtë të masave të BE-së ndaj Kosovës

Presidentja e Kosovës, Vjosa Osmani, në konferencën për media pas takimit me ministrin e Jashtëm të Gjermanisë, Johann Wadephul, ka kërkuar heqjen e menjëhershme të masave të Bashkimit Evropian ndaj Kosovës, duke i cilësuar ato si “të padrejta” dhe me ndikim të drejtpërdrejtë në jetën e qytetarëve.

Osmani tha se vizita e ministrit gjerman në Prishtinë është dëshmi e angazhimit të Berlinit që Ballkani Perëndimor të jetë pjesë e BE-së. Ajo theksoi se Gjermania mbetet aleati më i afërt dhe më i besueshëm i popullit të Kosovës.

“Vizita juaj në Kosovë si stacion i radhës në udhëtimin tuaj në Ballkanin Perëndimor është një dëshmi e qasjes tuaj dhe qeverisë së kancelarit Merz se Bashkimi Evropian mbetet i paplotë pa anëtarësimin e Ballkanit Perëndimor. Republika Federale e Gjermanisë ka qenë dhe do të mbetet aleat historik dhe tradicional i popullit të Kosovës”, deklaroi Osmani.

Ajo ritheksoi se Kosova është plotësisht e orientuar drejt integrimit euroatlantik.

“Kosova mbetet e përkushtuar ndaj orientimit të saj strategjik – anëtarësimit në NATO, BE, Këshillin e Evropës dhe në çdo organizatë ndërkombëtare ku ne kontribuojmë si shtet që mbron vlerat demokratike.”

Presidentja shtoi se mbështetja e Gjermanisë është kyçe për avancimin e Kosovës në proceset integruese, përfshirë trajtimin e aplikacionit për anëtarësim në BE.

“Shpresojmë që aplikacioni i Kosovës për anëtarësim në BE të procedohet në Komisionin Evropian, në mënyrë që vendit tonë t’i hapet rruga zyrtare drejt anëtarësimit final”, tha ajo.

Në mesin e çështjeve kryesore, Osmani e vuri theksin tek masat e BE-së ndaj Kosovës, të vendosura në qershor 2023, të cilat ajo i quajti të padrejta dhe të dëmshme.

“Heqja sa më e shpejtë e masave të padrejta të BE-së ndaj Kosovës është urgjencë e domosdoshme, sepse ato ndikojnë shumë negativisht në jetën e qytetarëve tanë. Në këtë rrugëtim, kemi nevojë për mbështetjen e vendosur të Gjermanisë”, tha Osmani.

Sa i përket dialogut Kosovë–Serbi, Osmani tha se Kosova është e përkushtuar ndaj fqinjësisë së mirë, por theksoi se një proces i barabartë është i pamundur përderisa Kosova vazhdon të mbetet nën masa.

“Përderisa Kosova mbetet nën masa të vetë BE-së, as dialogu i ndërmjetësuar nga BE nuk mund të konsiderohet i balancuar, parimor apo i barabartë”, deklaroi Osmani.

Presidentja Osmani konfirmoi gatishmërinë e Kosovës për të kontribuar në paqen dhe stabilitetin rajonal, duke kërkuar që Bashkimi Evropian të rishikojë urgjentisht vendimet që, sipas saj, e dëmtojnë këtë proces.