Osmani në Malishevë ofron mbështetjen e plotë të Presidencës

Komuna e Malishevës ka njoftuar se sot, në orët e mbrëmjes, presidentja Vjosa Osmani ka vizituar komunën ku është pritur nga kryetari Ekrem Kastrati. Qëllimi i vizitës ishte njoftimi i drejtpërdrejtë me gjendjen e krijuar nga reshjet e fundit dhe sfidat me të cilat po përballet komuna,transmeton KosovaPost.

Në njoftim potencohet se kryetari Ekrem Kastrati, e ka informuar Presidenten për situatën aktuale, masat e ndërmarra për menaxhimin e saj, si dhe për rreziqet potenciale me të cilat është përballur komuna. Ai ka theksuar se është aktivizuar Shtabi Emergjent, se ka pasur koordinim të vazhdueshëm me Agjencinë për Menaxhimin e Emergjencave (AME) dhe Forcën e Sigurisë së Kosovës (FSK), si dhe sa komuna ju ka dalë në ndihmë qytetarëve që kanë pasur nevojë.

“Kemi monitoruar vazhdimisht digën e Liqenit të Mirushës, për shkak të rrezikut që mund të paraqesë ndonjë avari”, ka thënë Katrati.

Bëhet e ditur se ai ka kërkuar mbështetjen e nivelit qendror për sanimin e dëmeve, kompensimin e të dëmtuarve dhe rindërtimin e infrastrukturës së dëmtuar, përfshirë digën dhe disa ura.

Në njoftim theksohet se, presidentja Vjosa Osmani ka përgëzuar Komunën e Malishevës dhe të gjitha ekipet emergjente për menaxhimin e situatës, duke shprehur solidarizimin e plotë me qytetarët dhe institucionet lokale. Ajo ka theksuar se, pavarësisht situatës së vështirë, nuk ka pasur humbje jete dhe se mbrojtja e jetës së qytetarëve ka qenë prioritet.

“Bashkë gjithmonë mund të punojmë në menaxhimin dhe parandalimin e situatave të tilla, sidomos tani që problemet janë identifikuar, gjë që e lehtëson marrjen e masave nga të gjitha nivelet”, ka deklaruar presidentja Osmani, duke ofruar mbështetjen e plotë të Presidencës në përballimin e situatës.

Pas takimit, Osmani dhe Kastrati kanë vizituar digën e Liqenit të Mirushës, për t’u njohur nga afër me gjendjen dhe rrezikun eventual që mund të paraqesë ajo.