Rajoni

Parashikimi i Milivojeviq: Vuçiq nuk do të qëndrojë në pushtet, ikja drejt Moskës e ngjashme me Asadin

Posted on by botaelajmeve

Presidenti i Partisë Demokratike të Serbisë, Srxhan Milivojeviq, ka deklaruar se miratimi i sotëm i Rezolutës së Parlamentit Evropian për Serbinë përbën “dështimin absolut të politikës së Aleksandar Vuçiqit”.

Ai gjithashtu ka theksuar se ngjarjet në “Cacilend” janë zhvilluar, sipas tij, nën drejtimin e vetë Vuçiqit, me qëllim që të fshihen pasojat e kësaj “rezolute madhështore”.

Duke folur për televizionin N1 nga Strasburgu, ku u miratua Rezoluta, Milivojeviq deklaroi se Vuçiq nuk do ta përfundojë mandatin e tij presidencial, do të rrëzohet para fundit të mandatit.

“Unë po ju jap fjalën – ai do të eliminohet para përfundimit të mandatit të Aleksandar Vuçiqit, i cili nuk do të jetë i lavdishëm. Ai ose do të arratiset si idhulli i tij, Asadi, në Moskë – aty ku ka fshehur pasuritë tona – ose do t’i dorëzohet organeve të drejtësisë,” tha Milivojeviq.

Sipas tij, fundi politik i Vuçiqit është i pashmangshëm, ndërsa skenat e fundit në “Cacilend” tregojnë se pushteti po përpiqet me çdo kusht të devijojë vëmendjen nga kritikat e ashpra të Parlamentit Evropian ndaj qeverisë në Beograd.