Parma dhe Sassuolo të interesuar për Kristjan Asllanin

Nuk përjashtohet mundësia që Kristjan Asllani të largohet nga Torino gjatë afatit kalimtar të dimrit.

Te Torino nuk janë të kënaqur me paraqitjet e Asllanit në gjysmën e parë të edicionit 2025/26. Megjithatë, edhe nëse largohet nga klubi, reprezentuesi i Shqipërisë pritet të vazhdojë karrierën në futbollin italian.

Gazetari italian, Alfredo Pedulla, ka shkruar të martën se Parma dhe Sassuolo janë të interesuara për shërbimet e Asllanit. Sipas Pedullas, të dy klubet e shohin Asllanin si futbollist me karakteristika të përshtatshme për skuadrat e tyre.

Asllani iu bashkua Torinos gjatë verës në formë huazimi nga Interi. Në rast të ndërprerjes së bashkëpunimit me Torinon, mesfushori nuk pritet të kthehet tek Interi, pasi nuk është pjesë e planeve të trajnerit, Cristian Chivu.

23-vjeçari Asllani këtë edicion me Torinon ka luajtur në 16 ndeshje.