“Pas Kimmel, do të ketë surpriza të tjera”, Trump paralajmëron me mbyllje të TV: Janë kundër meje

Disa prej rrjeteve televizive në Shtetet e Bashkuara mund të humbasin licencën. Paralajmërimi vjen nga vetë presidenti amerikan, Donald Trump, ndërsa mbështeti organin mbikëqyrës të transmetimeve të SHBA-ve në një debat mbi pezullimin e prezantuesit televiziv, Jimmy Kimmel.

“Lexova diku se rrjetet televizive ishin 97% kundër meje. Marr 97% mbulim negativ, megjithatë fitova lehtësisht. Fitova të shtatë shtetet e lëkundura, me votën popullore, fitova gjithçka. Dhe ata janë 97% kundër, më japin publicitet krejtësisht të keq… Ata zotërojnë një licencë, por mendoj se ndoshta licenca e tyre duhet të hiqet”, tha Trump.

ABC e ka hequr komedianin nga transmetimi “për një kohë të pacaktuar” pas komenteve të tij në lidhje me vrasjen e aktivistit politik konservator, Charlie Kirk, në Utah javën e kaluar. Kimmel duket se sugjeroi që i dyshuari ishte një mbështetës i Trump, shkruan A2 CNN.

Megjithatë, zyrtarët kanë thënë se ai ishte “i indoktrinuar me ideologji të majtë”. ABC e mbylli emisionin pasi Komisioni Federal i Komunikimeve, i kryesuar nga një i emëruar nga Trump, kërcënoi me veprime rregullatore, duke ngritur shqetësime se administrata Trump po kufizon lirinë e fjalës së kritikëve të saj. Kreu i Komisionit Federal të Komunikimeve e bëri të qartë gjithashtu se “pezullimi i Jimmy Kemmel nuk është surpriza e fundit”.

Studiuesit ligjorë thonë se amendamenti i parë i Kushtetutës së SHBA-së, i cili mbron lirinë e fjalës, do ta pengonte Komisionin të revokonte licencat për shkak të mosmarrëveshjeve politike. Shkrimtarë, aktorë dhe demokratë të shquar e kanë dënuar pezullimin e Kimmel. Ish-presidenti amerikan Barack Obama tha se administrata Trump e kishte çuar kulturën e anulimit në një “nivel të ri dhe të rrezikshëm duke kërcënuar rregullisht me veprime rregullatore kundër kompanive mediatike, përveç nëse ato i mbyllin gojën ose i pushojnë nga puna gazetarët dhe komentatorët që nuk i pëlqejnë”. Prezantuesit e emisioneve të vona të natës janë mbledhur në mbështetje të Kimmel.