Përmbytja e urës së re në Mitrovicë shkakton dëme qindra mijëra euro

Disa nga ato të rëndat, që nga nata e mbrëmshme kanë mbetur në këtë gjendje.

E krejt kjo pasi që në këtë punishte për ndërtimin e urës së re për këmbësorët në Mitrovicë, shtrati mbi lumin Ibër të premten pati rritje të nivelit të ujit.

Jahir Dedia, kontraktues për ndërtimin e urës së dytë, tha se momentin e ardhjes në vend të ngjarjes, ka vërejtur se uji kishte depërtuar edhe te pajisjet e punës.

“Kur kom ardhë e kom gjetur të gjithë punishten, e përfshirë me ujë, duke e quar komplet materialin e punishtes ndërtimore. Fatmirësisht që këtu e kemi betonuar pllakën një ditë para, edhe nuk ka lëvizur. Por, materiali që ka qenë këtu, e ka dërguar Ibri poshtë. Dëmet janë shumë të mëdha, qindra mijëra euro. I gjithë materiali që ka qenë këtu për punë, është dëmtuar”, deklaroi Dedia.

“Pavarësisht qëllimeve të këqija kushdo që i ka në këtë drejtim se këtë e ka bërë dorë njeri, pavarësisht edhe njerëzve që kanë reaguar, sot kompetent të kësaj lamie, unë kam thënë punën vetëm Zoti mundet me na ndalë”, tha ai.

Mirëpo të kundërtën po e thonë nga ndërmarrja “Ibër Lepenci”.

Sipas kryeshefit të kësaj ndërmarrje, Faruk Mujka, niveli i ngritjes së ujit ka ndodhur pasi ka pasur rrëshqitje të ujit nga kanali i dëmtuar në Zubin Potok.

“Natyra na prodhon na jep situata të papritura një e tillë ka qenë edhe mbrëmë ku kemi pasur rrëshqitje në pjesën e dëmtuar të kanalit te Zubin Potoku. Në mënyrë që të mbrohet kanali, dhe të mos kemi një përsëritje të përafërt nga ajo e vitit të kaluar, ujin e kemi drejtuar nga lumi Ibër deri sa e kemi ndalë në digën e liqenit të vogël të Pidvoricës”, tha Mujka.

Mujka tutje theksoi se kjo ngjarje nuk lidhet me sabotim të punimeve.

“Neve na vjen keq për dëmin që i është shkaktuar operatorit. Mirëpo thjesht duhet të treguar se nuk ka asnjë sabotim as ndonjë qëllim, është thjesht një ngjarje e cila ka ndodhur që fatmirësisht punëtorët e Ibër Lepencit e kanë evitua shpejt me dëme minimale” .

Në anën tjetër, zëvendësdrejtori i Policisë për rajonin e veriut, Veton Elshani në një përgjigje, ka thënë se aktualisht nuk ka elemente të veprës penale, dhe se përgjegjësia e dëmeve që janë shkaktuar i takojnë operatorit dhe ndërmarrjes së Ibër Lepencit.