Personi më i kërkuar i Evropës shihet për herë të parë, shëtitet lirshëm në Moskë

Kreu i arratisur i kompanisë teknologjike Wirecard, i cili u bë oficer i inteligjencës ruse, është parë në Moskë.

Jan Marsalek , i cili drejtonte një rrjet të gjerë spiunazhi me bazë në Mbretërinë e Bashkuar ndërsa ishte në arrati nga Interpoli, u fotografua në rrugët e Moskës, me një transplant flokësh, i mbajtur për dore me partneren e tij në kryeqytetin rus.

Është hera e parë që i ashtuquajturi njeriu më i kërkuar në Evropë dhe një nga njerëzit më të kërkuar në botë është parë në publik që kur ai iku në qershor 2020, kur kompania e tij – gjigandi gjerman i teknologjisë Wirecard – falimentoi, duke lënë një boshllëk në librat e kontabilitetit me vlerë 1.8 miliardë euro.

Ai kërkohet për mashtrim dhe po hetohet gjithashtu për spiunazh në disa vende evropiane.

Në një jetë të dyfishtë të pabesueshme, Drejtori i Teknologjisë i Wirecard dyshohet se punoi për Kremlinin për të paktën një dekadë dhe kishte qasje në një rrjet spiunësh dhe oficerësh policie në Mbretërinë e Bashkuar, SHBA, Gjermani, Austri, Izrael, Itali dhe Zvicër.

Pasi mashtrimi i Wirecard u zbulua, ai iku nga Gjermania për në Moskë.