Po ndryshohet jeta e qindra familjeve anë e mbanë Kosovës

Në ceremoninë e përurimit të punimeve në ndërtesat shumë-banesore sociale në Komunën e Mitrovicës së Jugut, në kuadër të projektit “Zbatimi i masave të efiçiencës së energjisë për ndërtesat shumë-banesore sociale”, kryeministri në detyrë, Albin Kurti, tha se ky projekt me investim mbi 380 mijë euro është pjesë e një programi më të madh që po ndryshon jetën e qindra familjeve anë e mbanë Kosovës.

Në Mitrovicën e Jugut sot janë përuruar punimet në ndërtesat shumë-banesore sociale, të rinovuara në kuadër të projektit “Zbatimi i masave të efiçiencës së energjisë për ndërtesat shumë-banesore sociale”.

Ky projekt, me investim mbi 380 mijë euro, u vlerësua si një hap i rëndësishëm drejt përmirësimit të kushteve të jetesës për qytetarët, veçanërisht për familjet me nevojë më të madhe për mbështetje.Në këtë ceremoni mori pjesë kryeministri në detyrë, Albin Kurti, i cili tha se ky investim është pjesë e një programi më të gjerë që po ndryshon jetën e qindra familjeve anë e mbanë Kosovës.

Kurti tha se këto ndërtesa që po përurohen sot në Komunën e Mitrovicës së Jugut janë me kushte të dinjitetshme për jetesë për të gjithë banorët dhe siç tha ai, po shënohet një hap i rëndësishëm në rrugëtimin e një shteti, i cili kujdeset për qytetarët, veçanërisht për ata që kanë nevojë më shumë për mbështetje.

“Shipoli dhe Desi nuk janë vetëm emra lagjesh në Mitrovicë, por janë edhe histori familjesh, që për vite të tëra kanë jetuar në kushte të vështira. Sot pra këto banesa janë më të ngrohta më të sigurta më të denja”, tha Kurti.

Ai më tej shtoi se këto objekte janë shenja e një shteti i cili po e kthen vëmendjen aty ku ajo ka munguar.

“Ky projekt me investim mbi 380 mijë euro është pjesë e një programi më të madh që po ndryshon jetën e qindra familjeve anë e mbanë Kosovës”, theksoi Kurti.

Ai falënderoi bashkëpunimin e ngushtë mes Ministrisë së Ekonomisë, Fondit të Kosovës për Efiçiencë të Energjisë dhe BE-së.

Ndërkaq, ministrja në detyrë e Ekonomisë, Artane Rizvanolli, tha se këto investime, që po bëhen me përkrahjen e BE-së, nuk janë vetëm shifra në metra katrorë apo shifra të kursimit të energjisë, që në këtë ndërtesë arrin gati në 80%, por sipas saj, për më tepër është një përmirësim i jetës së qytetarëve.