Prokurorja thotë se i akuzuari për fajde Beqir Hoxha, ka qenë katër herë i dënuar me kusht

Sipas aktakuzës për fajde, të dëmtuarit F.S dhe prindi i tij Sh.S duke qenë në gjendje të rëndë financiare dhe nga nevoja për investuar në biznesin familjar, kanë kërkuar të holla nga i akuzuari Hoxha dhe se në emër të fajdesë i dëmtuari F.S është detyruar t’i paguajë shumën mbi 78 mijë euro, raporton “Betimi për Drejtësi”.

Prokurorja Shajkovci gjatë elaborimit të fjalës përfundimtare të hënën në Gjykatën Themelore në Prishtinë, tha se Gjykatës i dorëzohet e kaluara kriminale për Hoxhën.

Shajkovci tha se Hoxha është i dënuar paraprakisht nga Gjykata Themelore në Prizren për veprën penale “Lajmërim i rremë”, me vendim tjetër për “Lëndim të lehtë trupor”, si dhe me një tjetër vendim për vepra të rënda kundër sigurisë në komunikacion.

Po ashtu, tha se nga Gjykata Themelore e Gjakovës, i akuzuari është i dënuar për veprën penale “Lëndim i rëndë trupor”.Sipas Prokurores, në krejt këto vendime, janë shqiptuar dënime me kusht. Andaj, tha se me rastin e caktimit të dënimit, Gjykata duhet të ketë parasysh edhe të kaluarën kriminale të të akuzuarit.

Raporti do të përditësohet…

Ndryshe, Prokuroria Themelore në Prizren më 6 nëntor 2023, pranë Gjykatës Themelore në Prizren, ka ngritur aktakuzë ndaj Beqir Hoxhës, i cili po ngarkohet për veprën penale të fajdesë.

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.