Qeveria mbështet prodhuesit në liberalizimin e tregut të energjisë

Këshilli Kombëtar për Ekonomi dhe Investime mbajti sot takim me odat ekonomike dhe prodhuesit vendorë lidhur me procesin e liberalizimit të tregut të energjisë elektrike, me kërkesë të Qeverisë së Kosovës.

Në takim morën pjesë kryeministri në detyrë Albin Kurti, ministrja në detyrë e Ekonomisë Artane Rizvanolli, ministrja në detyrë e Industrisë Rozeta Hajdari, drejtori i Bordit të ZRrE-së Ymer Fejzullahu, U.D. i kryeshefit Ekzekutiv të KEK-ut Gramoz Hashani dhe përfaqësues të bizneseve prodhuese.

“Qeveria e Republikës së Kosovës do të qëndrojë pranë prodhuesve në çdo sfidë që rrjedhë nga ky proces,” tha kryeministri Kurti.

Ministrja Rizvanolli shtoi se “Ministria e Ekonomisë dhe Qeveria e Republikës së Kosovës do të vazhdojnë komunikimin dhe bashkëpunimin intensiv me bizneset, dhe veçanërisht prodhuesit, për t’i ndihmuar në përballjen me këto sfida”.

Në njoftimin e Qeverisë bëhet e ditur se u dakordua që të mbahet një takim i përbashkët mes furnizuesve të energjisë dhe kompanive që dalin në treg të hapur, për shkëmbim të informacionit dhe rritje të konkurrencës.

Drejtori i ZRrE-së, Fejzullahu, njoftoi se “nga 19 maji ZRrE ka pasur komunikime me furnizuesit e licensuar, ku gjashtë janë aktivë dhe pesë kanë dhënë oferta furnizimi.” Ai tha gjithashtu se “numri i kompanive të licensuara për furnizim me energji elektrike ka arritur në 21.”

U.D. Kryeshefi i KEK-ut, Hashani, sqaroi se kompanitë që nuk arrijnë të nënshkruajnë kontrata furnizimi duhet të lidhin kontratë me KEK-un, për të përfituar nga opsioni i furnizuesit të fundit sipas legjislacionit.