Rama në Emirate, fokus tek energjia e pastër dhe bashkëpunimi strategjik

Kryeministri i Shqipërisë, Edi Rama po merr pjesë në Samitin e Javës së Zhvillimit të Qëndrueshëm, një forum ndërkombëtar që po mbahet në Emiratet e Bashkuara Arabe dhe që mbledh liderë politikë, ekonomikë dhe institucionalë nga e gjithë bota.

Në një mesazh të shpërndarë në rrjetet sociale, Rama njoftoi nisjen e punimeve të samitit, i cili zhvillohet nën patronazhin e Presidentit të Emirateve, Sheikh Mohammed bin Zayed Al Nahyan, të cilin e cilësoi si një mik të veçantë të Shqipërisë.

Kreu i qeverisë theksoi se Emiratet e Bashkuara Arabe mbeten një vend ku ai ndihet gjithmonë i mirëpritur, ndërsa kjo vizitë shërben si një mundësi për të thelluar më tej marrëdhëniet dypalëshe. Sipas tij, diskutimet do të përqendrohen në iniciativa konkrete që lidhen me zhvillimin e qëndrueshëm, tranzicionin energjetik dhe projekte me rëndësi strategjike për ekonominë.

Samiti, i mbështetur nga Emiratet dhe nga kompania lider globale në energjinë e pastër, Masdar, synon të trajtojë sfidat kryesore globale në fushën e qëndrueshmërisë dhe zhvillimit të përgjegjshëm.

Gjatë punimeve, vendet pjesëmarrëse do të angazhohen në dialog dhe bashkëpunim për të përshpejtuar rritjen ekonomike gjithëpërfshirëse, duke ruajtur ekuilibrin social dhe mjedisor.

Në kuadër të kësaj vizite, pritet që Shqipëria dhe Emiratet e Bashkuara Arabe të diskutojnë mundësi të reja bashkëpunimi, veçanërisht në sektorin e energjisë së pastër, investimeve strategjike dhe projekteve afatgjata të zhvillimit të qëndrueshëm.