Real Madridi kthehet në punë, nis ndryshimi “Made in Ksabi”

Ishte një kohë kur Reali i Madridit, si të gjitha ekipet në La Liga, fillonte fazën përgatitore në fund të korrikut dhe nuk luante ndeshjen e parë zyrtare deri në shtator. Pati vera të gjata përgatitjesh dhe shumë miqësore.alonsoNë mesin e viteve 1970, për shembull, pushimet e lojtarëve të Realit të Madridit ndaheshin në 30 ditë për çiftet e martuara dhe 20 ditë për beqarët! Janë kujtime që ndoshta shërbejnë edhe si grimca humoristike tani. Sepse futbolli modern ka ndryshuar mjaft. Jo më larg se dje, Real ka nisur përgatitjet për sezonin 2025-26. Por jo sepse i nënshtrohet metodave të aplikuara gjysmë shekulli më parë. Por i diktuar nga një sezon 2024-2025 i pafundëm, që u mbyll në korrik pas pjesëmarrjes në Kupën e Botës për Klube.

Pas ndeshjes kundër PSG-së në gjysmëfinale, trajneri Ksabi Alonso do të deklaronte: “Kjo është ndeshja e fundit e sezonit 2024-25 dhe në gusht do të fillojmë sezonin 2025-26, i cili do të jetë pak më ndryshe. Fillojmë gjithçka nga e para!” Ky moment ka mbërritur kur të hënën pas testeve fizike të mëngjesit (ora 10:00), pasdite në orën 18:00 Reali ka zbritur dhe në fushë në Valdebebas. Nga të gjitha parasezonet në historinë e gjatë të Madridit, ajo që ka nisur dje do të ketë një vend të veçantë. Sepse Alonso do të duhet të punojnë me shpejtësi të plotë në mënyrë që skuadra e tij – dhe idetë e tij – të jenë gati kur Osasuna të vizitojë “Bernabeun” më 19 gusht. Kalendari i ngjeshur me të cilin përballet futbolli botëror do të thotë që Madridi është rikthyer në punë vetëm 26 ditë pasi ndaloi së luajturi. Më 9 korrik, ata humbën ndaj PSG-së, më 10 u rikthyen në Madrid dhe më 4 gusht janë rikthyer në stërvitje! Pushimi tre-javor i përcaktuar në marrëveshjen kolektive është respektuar.

Por nga tani deri në ndeshjen hapëse të La Ligës, kanë mbetur vetëm dy javë, diçka që e ka vënë Madridin në përballje me La Ligën dhe Federatën. “Shtëpia e Bardhë” e konsideron këtë kohë pune të pamjaftueshme dhe përbën rrezik për shëndetin e lojtarëve dhe sezonin. Ky qëndrim mbështetet nga AFE (Shoqata Federale e Shoqatave të Futbollit). Megjithatë, Komiteti i Garave i RFEF-së e hodhi poshtë kërkesën e Realit të Madridit për të shtyrë ndeshjen kundër Osasunës. Gatishmëria e ekipit nga Pamplona për të ndryshuar datën e ndeshjes hapëse të ligës ishte e kotë. Brenda 15 ditësh, Ksabi Alonso do të duhet të përgatisë makinerinë e ekipit të tij për të nisur fuqishëm ndeshjen kundër Osasunës në La Liga. Për momentin, e vetmja mundësi në këtë listë është ndeshja miqësore kundër Tirolit, e cila do të luhet në Insbruk (Austri) në ditët në vijim.

PA MASTANTUONON – Në rrugëtimin e nisur dje në Valdebebas, Alonso nuk i ka pasur ende të gjithë lojtarët që do të jenë pjesë e skuadrës së tij kur të mbyllet tregu i transferimeve në fund të gushtit. Endrik, i dëmtuar, po punon që të jetë gati sa më shpejt të jetë e mundur. Ndërkohë, Franko Mastantuono do të duhet të stërvitet veçmas nga shokët e tij të ekipit. Ai nuk do të jetë në gjendje ta bëjë këtë deri më 14 gusht, kur të mbushë 18 vjeç. Alvaro Karreras kthehet në “Ciudad Deportiva” ku është rritur pas aventurës në Portugali me Benfikën. Seanca stërvitore e mëngjesit të sotëm ka qenë e para e tij nën drejtimin e Alonsos. Pavarësisht përpjekjeve të tij më të mira, galiciani nuk mundi të luante për Realin në Kupën e Botës për Klube për shkak të dështimit për të arritur një marrëveshje me Benfikën. Kjo është diçka që dy përforcimet e tjera për mbrojtjen, Dean Hausen dhe Trent Aleksandër-Arnold, arritën ta bënin.

NDRYSHIMI I STILIT – Ksabi pritet të sjellë një sezon ndryshimesh. Katër sezonet në të cilat Ançeloti e solli dy herë Ligën e Kampionëve në kabinetin e trofeve të Valdebebas kanë mbaruar. Ndaj Liga e Kampioneve është vendi ku termometri do të jetë kundër Alonsos. Askush nuk ka nevojë t’i shpjegojë trajnerit bask se, në shtëpinë e tij të re, Liga e Kampionëve është i vetmi ligj që ndaj dështimin nga suksesi. Idetë e Alonsos janë vënë tashmë në lëvizje. Presioni i menaxhimit të Madridit nuk do të pakësohet nga parasezonet e shkurtra. Kjo, pas dy javësh, do të jetë në të kaluarën. Dhe në Madrid, e tashmja është e vetmja gjë që ka rëndësi.