Shkarkohet Mourinho

Jose Mourinho nuk është më trajner i Fenerbahçes.

Këtë klubi turk e bëri të ditur të premten paradite.

Fenerbahçe nuk ia doli të kualifikohet në Ligën e Kampionëve dhe kjo i kushtoi me pozitë teknikut të njohur portugez. Mourinho e ka drejtuar Fenerbahçen gjatë kampionatit të kaluar, por nuk ka arritur objektivat.

Ai është prej trajnerëve më të vlerësuar në futbollin evropian.

62-vjeçari e udhëhoqi Fenerbahçen në plejof të Championsit, ku gjiganti turk u ndal nga Benfica. Ai ishte në krye të skuadrës nga qershori i vitit të kaluar.

“E falënderojmë atë për përpjekjet për ekipin tonë dhe i dëshirojmë sukses në karrierë”, ka shkruar Fenerbahçe.

Ka raportime se Mourinho mund të fillojë menjëherë punë në Angli. Gjatë karrierës impresive ai ka drejtuar Benfican, Uniao de Leirian, Porton, Chelsean, Interin, Real Madridin, sërish Chelsean, Manchester Unitedin, Tottenhamin e Romën.

Me Porton e fitoi Ligën e Kampionëve, ndër të tjera. Me Chelsean fitoi tre tituj të Premier Leagues, me Interin fitoi Ligën e Kampionëve, Serie A, Kupën dhe Superkupën e Italisë, ndërsa me Realin e fitoi La Ligan dhe Kupën e Mbretit.

Me Manchesterin, portugezi triumfoi në Ligën e Evropës, ndërsa me Romën në Ligën e Konferencës.