Trump reagon ashpër ndaj vendimit për tarifat: Gjykata shumë e politizuar

Një gjykatë apeli në SHBA ka vendosur që shumica e tarifave të vendosura nga presidenti amerikan, Donald Trump janë të paligjshme, duke hapur rrugën për një përballje të mundshme ligjore që mund të tronditë agjendën e politikës së jashtme.

Vendimi prek tarifat “reciproke” të Trumpit, të vendosura ndaj shumicës së vendeve në botë, si edhe tarifat ndaj Kinës, Meksikës dhe Kanadasë.

Me një vendim 7-4, Gjykata e Apelit për Qarkun Federal rrëzoi argumentin e Trumpit se tarifat lejoheshin në bazë të Aktit për Fuqitë Ekonomike në Raste Emergjente, duke i quajtur ato “të pavlefshme dhe në kundërshtim me ligjin”.

Vendimi nuk do të hyjë në fuqi deri më 14 tetor, për t’i dhënë kohë administratës që të kërkojë ndërhyrjen e Gjykatës së Lartë.

Trump e kritikoi vendimin dhe gjykatën duke thënë se “nëse lejohet të qëndrojë, ky vendim do t’i shkatërrojë fjalë për fjalë Shtetet e Bashkuara të Amerikës”.

“Ata sot, si një Gjykatë Apeli shumë e politizuar, gabimisht tha se tarifat tona duhet të hiqen, por ata e dinë që Shtetet e Bashkuara të Amerikës do të fitojnë në fund”, shkroi ai.

“Nëse këto tarifa do të hiqeshin ndonjëherë, do të ishte një katastrofë totale për vendin. Do të na bënte ekonomikisht të dobët dhe ne duhet të jemi të fortë”, shtoi ai.

Trump i kishte justifikuar tarifat bazuar në Aktin Ndërkombëtar për Fuqitë Ekonomike në Raste Emergjente (IEEPA), i cili i jep presidentit fuqinë të veprojë kundër kërcënimeve “të pazakonta dhe të jashtëzakonshme”.

Trump kishte shpallur një gjendje emergjente kombëtare për tregtinë, duke argumentuar se pabarazitë tregtare përbëjnë rrezik për sigurinë kombëtare të SHBA. Por gjykata vendosi se vendosja e tarifave nuk është në kompetencën e presidentit, dhe se përcaktimi i taksave është “një kompetencë thelbësore e Kongresit”.

Nëse Gjykata e Lartë vendos ta marrë çështjen në shqyrtim, në dorë të nëntë gjyqtarëve të saj do të jetë të vendosin nëse programi i tarifave i Trumpit përbën tejkalim të kompetencave presidenciale apo nëse është i bazuar në mënyrë të mjaftueshme në ligj dhe autoritetin e presidentit.

Edhe pse gjykata e apelit i dha një goditje presidentit, Shtëpia e Bardhë mund të ngushëllohet nga fakti që vetëm tre nga njëmbëdhjetë gjyqtarët e gjykatës janë emëruar nga republikanët.

Gjykata e Lartë ka gjashtë gjyqtarë të emëruar nga republikanët, përfshirë tre të zgjedhur nga vetë Trump