Turqia ndërpret marrëdhëniet ekonomike dhe mbyll hapësirën ajrore për Izraelin

Turqia ka vendosur të ndërpresë plotësisht të gjitha lidhjet tregtare dhe ekonomike me Izraelin dhe po mbyll hapësirën e saj ajrore për aeroplanët izraelitë, njoftoi Ministri i Jashtëm turk Hakan Fidan.

Siç shkruan Jerusalem Post, pasojat ekonomike të këtij veprimi nuk dihen ende, por devijimet për shkak të hapësirës ajrore të mbyllur mund të rrisin kohën e udhëtimit të fluturimeve nga Izraeli në vende si Gjeorgjia dhe Azerbajxhani me pothuajse dy orë.

“Turqia ka njoftuar tashmë përfundimin e marrëdhënieve ekonomike me Izraelin në të kaluarën, por lidhjet kanë vazhduar”, tha një zyrtar izraelit.

Lëvizja vjen pas raportimeve se autoritetet turke kanë filluar t’u kërkojnë në mënyrë joformale agjentëve të transportit detar të japin letra që vërtetojnë se anijet nuk janë të lidhura me Izraelin dhe nuk transportojnë mallra ushtarake ose të rrezikshme të destinuara për atë vend.

Sipas burimeve të transportit detar, autoriteti portual ka udhëzuar verbalisht agjentët e portit të japin garanci me shkrim, por nuk është lëshuar asnjë letër zyrtare për këtë qëllim.

Ndryshe, lëvizja është një vazhdim i masave të Turqisë kundër Izraelit pasi ajo ndërpreu tregtinë me vendin, me vlerë rreth 6 miliardë euro në vit, vitin e kaluar për shkak të luftës në Rripin e Gazës.