Lajme

Vasfije Krasniqi: Dhimbja ime është pjesë e historisë sonë

Posted on by botaelajmeve

Vasfije Krasniqi Goodman është kthyer në një grua simbol dhe heroinë për shumë gra e vajza që përjetuan dhunën seksuale nga forcat serbe gjatë luftës në Kosovë.

Ajo, në një postim në Facebook, 26 vjet pas dhunimit nga forcat serbe, thotë se 14 prilli i vitit 1999 është një datë që nuk e shënon vetëm në kujtesë, por në çdo qelizë të trupit të saj dhe se jeta e saj ndryshoi përgjithmonë.

“Atë ditë, jeta ime ndryshoi përgjithmonë. Para saj, frika ime më e madhe ishte vdekja – një e panjohur që më përndiqte në netët pa gjumë, në zhurmën e çdo shpërthimi, në ecjen e çdo ushtari serb që afroheshin gjithnjë e më shumë. Por pas 14 prillit, një frikë tjetër më e rëndë u ngulit në shpirtin tim: frika e dhunës, e përdhunimit – diçka që kurrë nuk e mendoja se do të më ndodhte, diçka që e kisha parë vetëm në rrëfimet e të tjerëve, e që mendova se do të më kalonte pranë pa më prekur. Por jo. Pas asaj dite, vdekja u bë një dëshirë, jo një frikë. E kërkova, e lutej zemra ime për të, sepse ndihesha e shkatërruar, e thyer në çdo formë të mundshme. Trupi im nuk ishte më i imi. Zëri im ishte heshtur, ndërsa bota kishte ndalur së dëgjuari. Dhe sërish, vdekja nuk erdhi. Jetova”, shkruan Krasniqi Goodman.
Ajo thotë se jetoi edhe pse shumë herë mendonte të dorëzohet.

“Në errësirat e netëve të mia, kërkova arsye për të vazhduar, për të ngritur kokën, për të mos u rrëzuar përfundimisht. Dhe sërish, nuk e di nga vinte ajo forcë që më mbante gjallë. Ndoshta nga kujtimi i familjes, ndoshta nga shpresa se një ditë zëri im do të dëgjohej, ose ndoshta nga dëshira që askush tjetër të mos kalojë atë që unë kalova”, thotë tutje ajo.

Krasniqi Goodman, thotë se ka parë të mirën dhe të keqen në jetë, ka takuar njerëz që e kanë ndihmuar të ngrihet dhe të tjerë që e thyen pa mëshirë.

“Por sot, kur e kujtoj atë ditë, nuk jam më vetëm viktimë. Jam dëshmi. Jam një zë që mbijetoi dhe që nuk do të heshtë më. Sepse dhimbja ime është pjesë e historisë sonë, dhe ajo duhet të dëgjohet”, shkruan në Facebook, Krasniqi Goodman.