Vdes një viktimë pjesëmarrëse në rastin ndaj ish-krerëve të UÇK-së

Sipas njoftimit të 14 prillit 2025, viktima e ka kodin 217/06 dhe ishte pranuar që të marrë pjesë në procedura më 21 prill 2021, njofton Betimi për Drejtësi.

Në njoftim thuhet se viktima ishte pranuar që të jetë pjesëmarrëse në proces si rezultat i vuajtjes së dëmit mendor si viktimë indirekte e burgosjes, arrestimit, ndalimit arbitrar dhe keqtrajtimit.

“V217/06 kishte gjithashtu statusin e dëshmitarit në këtë çështje”, thuhet në njoftimin e mbrojtësit të viktimave.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit  të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimitdhe Jakup Krasniqit është konfirmuar më 26 tetor 2020.