Vetaksident në Prizren, lëndohen shoferi dhe dy pasagjerë

Një vetaksident ka ndodhur mëngjesin e sotëm në rrugën “Adem Jashari” në Prizren, ku janë lënduar shoferi dhe dy pasagjerë.

Zëdhënësi i Policisë për rajonin e Prizrenit, Shaqir Bytyqi, i tha Gazetës Express se shoferi ka pësuar lëndime më të rënda por jo në rrezik për jetë.

“Si pasojë e aksidentit, tre persona (ngasësi dhe dy pasagjerë) kanë pësuar lëndime trupore. Ngasësi ka marrë lëndime më të rënda, por sipas informacioneve mjekësore gjendja e tij nuk paraqet rrezik për jetë. Përveç lëndimeve trupore, aksidenti ka shkaktuar dëme të mëdha materiale si në automjetin e përfshirë, ashtu edhe në pronë private dhe publike. Në vendin e ngjarjes kanë dalë menjëherë njësitë e Policisë së Kosovës, Emergjenca dhe Zjarrfikësit, të cilët kanë menaxhuar situatën dhe kanë ndërmarrë të gjitha veprimet e nevojshme ligjore dhe procedurale. Hetimet lidhur me shkaqet e aksidentit janë duke vazhduar.”