“Cirk, spektakël nga kreu i ndërmarrjes kriminale, ne nuk qanim për kamerat por…”, familja e Haki Imerit reagon pas vizitës së Thaçit

Përmes një shkrimi në Facebook, ata e quajnë Thaçin kreu i ndërmarrjes së përbashkët kriminale, i cili ka shkuar të derdhë një lot tek shtrati i babait të tij dhe kështu filloi cirku.

“-Gjykata Speciale e Kosovës bëri një gjest tejet fisnik: i dha leje Kreut të ndërmarrjes së përbashkët kriminale të shkojë të derdhë një lot tek shtrati i babait të tij. -Dhe ja ku nis cirku! Karroca e propagandës, e tërhequr nga kuajt e stërvitur të gënjeshtrës, doli në shesh, duke u ankuar me zëra të përvajshëm se Gjykata e Hages është e “padrejtë”! -Nga tendat e errëta të manipulimit, telallet e zakonshëm të propagandës rrotullohen nëpër publik, me buzët lyera deri te veshët, duke qeshur e qarë njëkohësisht.

-Njëri tund një pankartë me mbishkrimin “Padrejtësi e madhe!”, tjetri shkul flokët, ndërsa një tjetër reciton fjalime për komplotin botëror që u paska bërë bashkë kundër heronjve të djeshëm..

-Mbi të gjitha, orkestrën e ‘mëkaterëve te penduar’ e drejton dirigjenti i klaneve, duke u siguruar që çdo vajtim të bjerë në veshët e publikut si një simfoni e përsosur mashtrimi..

-Por ndërkohe , ne dikur nuk i derdhëm lotët për të na parë kamerat dhe mikrofonët.

-Ne qanim me dhimbje të vërtetë për ata që u vranë , në pusi e në pabesi, nga skuadra e vrasjeve të SHIK-ut.

-Ne nuk qanim për shefat e bandave kriminale, por për të dashurit tanë të prerë në besë”, ka shkruar familja e Haki Imerit në reagimin e tyre.

Tutje, ata thonë se presin drejtësi, gjersa kanë shtuar se karavani i drejtësisë vazhdon të ecë ngadalë, por sigurt drejt finales së madhe.

“-Dhe sot, ndërsa ende presim drejtësi, na duhet të shohim lotët atyre që spiunonin dje për Thaçin e sot qajne dhe shesin lëkurën për të shpëtuar veten…

-Ata që sot hedhin helm nëpër studio televizive dhe psherëtijnë me dramë të stisur, janë të njëjtët që dikur ishin bashkëpunëtorët më besnikë të Thaçit, porse edhe armiqtë e tij më të efektshem…

-Tani, pasi i ka de-maskuar koha , kërkojnë ta shpërlajnë veten nga njollat e tradhtisë, duke aktruar sikur u vjen keq për “shefin” e tyre.

-Por le të mos lodhen kot – se ky film ka mbaruar, dhe publiku e di fundin!

-Ndërkohë, spektakli qesharak vazhdon!

-Horrat e propagandës kërcejnë mbi litarin e gënjeshtrës dhe hedhin tym për të hutuar publikun.

-Karvani i drejtësisë vazhdon të ecë ngadalë, por sigurt, drejt finales së madhe.

-E vërteta mund të vonojë, është provuar te pengohet nga batakçinjtë dhe armiqtë e drejtësisë , por në fund gjithsesi mbërrin.

-Dhe kur të mbërrijë, do të fiken dritat e spektaklit dhe maskat do të bien një nga një…”, përfundon reagimi.