Shpërthimi në objektin e postës në Zveçan, Peci: Provokim i rrezikshëm dhe vepër e organizuar terroriste

Pas shpërthimit me granata dore në zyrat e Postës së Kosovës ka reaguar edhe kryetari i Komunës së Zveçanit, Ilir Peci.

Përmes një postimi në rrjetin social në Facebook Peci ka shkruar se ky incident ka shkaktuar dëme materiale, por fatmirësisht pa viktimë në njerëz.

Ai e cilësoi këtë akt si provokim të rrezikshëm dhe vepër të organizuar terroriste.

“Kryetari i Komunës së Zveçanit, Ilir Peci  ka dënuar  sulmin me granatë që u bë sot kundër zyrave të Postës së Kosovës në qendrën e këtij qyteti verior. Ky incident, i cili ndodhi në orët e mëngjesit, ka shkaktuar dëme materiale, por fatmirësisht pa viktima njerëzore. Peci e ka cilësuar këtë akt si ‘një provokim të rrezikshëm dhe vepër të organizuar terroriste kundër qetësisë dhe stabilitetit në komunë’ ”, ka shkruar Peci.

Kryetari i Komunës së Zveçanit po ashtu ka thënë se ky sulm është një tentativë e qartë për të destabilizuar rajonin dhe për të shkaktuar frikë te qytetarët.

“Autorët duhet të gjenden dhe të paraqiten përpara drejtësisë”, deklaroi Peci.

Ndryshe, sot rreth orës 00:20 persona të panjohur kanë hedhur dy granata dore në objektin e Postes se Kosovës në Zveçan.

Policia e Kosovës ka bërë të ditur se si pasojë e shpërthimit të njërës granatë janë shkaktuar dëme materiale, mirëpo nuk është raportuar për të lënduar.