Tradhti kombëtare – Vrasje e porositur nga armiqtë, por e realizuar nga shqiptarët / 25 vite pa Komandant Drinin

Ekrem Rexha, i njohur si Komandant Drini, u qëllua për vdekje më 8 maj të vitit 2000.

Vrasja e njërit prej komandantëve më të zot të Ushtrisë Çlirimtare të Kosovës, Ekrem Rexha – Komandant Drini, i cili është ndër më të merituarit për çlirimin e qytetit të Prizrenit, ka mbetur ende një enigmë e pazgjidhur.

Kur kanë kaluar më shumë se 25 vite nga ajo vrasje makabre, tashmë shpresat për zbardhjen e saj janë venitur, pasi drejtësia vendore ka dështuar plotësisht në hetimin dhe zbulimin e autorëve të vrasjes së Drinit.

Reagon familja Rexha

Familja Rexha, në 25-vjetorin e vrasjes së Drinit, shprehet e zhgënjyer me mungesën e drejtësisë në rastin e tij.

“Bëhen 25 vite nga kërkesa për të vërtetën, bëhen 25 vite nga pritjet e të vërtetës, bëhen 25 vite pikëllimi, bëhen 25 vite dëshpërimi për të ditur mbi fatin e babit tonë Ekrem Rexha – Komandant Drini. Edhe pas 25 vitesh, ne përsëri më 08.05.2025 do të jemi në Landovicë duke e përkujtuar babin tonë! Duke përsëritur për të 25-ën herë, ne qëndrojmë pranë varrit të tij për ta kujtuar veprën dhe sakrificën e tij për një Kosovë të lirë, por njëkohësisht me heshtje dhe dhimbje, gjithnjë e shprehim zhgënjimin tonë për mosveprim të institucioneve të drejtësisë – mu për ato për të cilat Komandant Drini ka luftuar”, thuhet ndër të tjera në reagimin e familjes Rexha.

Ata theksojnë se Drini u vra nga tradhtarët, të cilët, sipas tyre, janë dorë e zgjatur e Serbisë.

“Mos e lejoni që edhe nipat të pyesin: çfarë ndodhi me gjyshin? I plagosur në luftë nga shkau, i vrarë në liri nga tradhtarët – dorë e zgjatur e Serbisë! Ende sot nuk ka drejtësi për çlirimtarin e Prizrenit”, thuhet më tej në reagimin e familjes së Komandant Drinit.

Vrasje me porosi

Sipas analistëve, shpresa e vetme për zbardhjen e kësaj vrasje mbetet Gjykata Speciale, ani pse ato janë të vogla. Ata thonë se kjo vrasje u porosit nga armiqtë e Kosovës, por u realizua nga shqiptarët.

Skender Zogaj

“Vrasja e Ekrem Rexhës – Komandant Drinit, është njëri nga aktet më të shëmtuara në historinë tonë, sepse lidhet me tradhti kombëtare. Ka ndodhur pas çlirimit të Kosovës, që nënkupton se ishte një vrasje e porositur nga armiqtë e Kosovës, por e realizuar nga vetë shqiptarët e Kosovës!”, shprehet Zogaj.

“Kjo nuk ka fije dyshimi, njësoj si moszbardhja e vrasjes, që është plotësisht e kuptueshme si akt i njerëzve të inkriminuar, të cilët, menjëherë pas luftës, kapën institucionet shtetërore dhe instaluan struktura të krimit të organizuar dhe korrupsionit! Vrasja e Komandant Drinit ishte e planifikuar nga konkurrentë frikacakë, që oficerin madhor e panë si pengesë për aktivitetin kriminal të bandave në shërbim të interesave për pushtet dhe pasurim të paligjshëm”, shton Zogaj.

Më tej, ai thekson se drejtësia e Kosovës ka dështuar plotësisht dhe mban përgjegjësi të drejtpërdrejtë për moszbardhjen e kësaj vrasje.

“Komandant Drini njihej si një profil tjetër – një institucionalist me dije të larta profesionale, formim të thellë intelektual dhe vlera të mirëfillta kulturore e morale, që nuk ishin të mirëpritura nga mbeturinat pseudo-atdhetare. Këta të fundit kishin nisur vrasjet që më herët – që nga vrasja e ministrit të Luftës, kolonelit Ahmet Krasniqi, dhe figurave të tjera që ende sot nuk dihet kush i vrau. Por dihet se u vranë tinëzisht, me plumba në shpinë. Një figurë brilante si Komandant Drini, poliglot i gjashtë gjuhëve botërore, ishte pengesë për ‘cubët e çajit’ – dhe kjo është arsyeja kryesore pse ai u vra. Por, përveç vrasësve, fajtorja më e madhe mbetet drejtësia kosovare, që heshti dhe ‘e hëngri turpin me bukë’, duke mos u angazhuar për zbardhjen e vrasjes së Komandant Drinit dhe shumë e shumë figurave të tjera të atdhetarisë së pastër”, deklaron Zogaj.

Por, a ka shpresë te Gjykata Speciale për zbardhjen e kësaj vrasje?

“Ky është një krim i dyfishtë, sepse roli që duhej ta kishte drejtësia vendore, sot e ka marrë Haga. Kjo mbetet njëfarë shprese, por në fakt, nuk do të mund ta japë verdiktin e merituar për këto vrasje. Publiku ynë i ka varur shpresat te Gjykata e Hagës, por kjo është absurde – sepse, nëse institucionet tona nuk duan, pse duhet që dikush tjetër ta bëjë punën tonë? Vrasjet që i kemi bërë vetë, ne edhe duhet t’i zbardhim vetë, për të treguar se e meritojmë lirinë, pavarësinë dhe dinjitetin kombëtar”, përfundon analisti Skënder Zogaj.