Spanja merr vendimin, shkurton orarin javor të punës

Qeveria spanjolle ka miratuar një projektligj që parashikon shkurtimin e javës së punës nga 40 në 37.5 orë, me synimin për të rritur produktivitetin dhe përmirësuar mirëqenien e punonjësve. Drafti kalon tashmë për shqyrtim në parlament, ku ekipi i kryeministrit Pedro Sánchez përballet me sfidën e sigurimit të mbështetjes në mungesë të një shumice të qartë.

Ministria e Punës vlerëson se rreth 12.5 milion punonjës në sektorin privat, të punësuar me kohë të plotë apo të pjesshme, do të përfitojnë nga kjo reformë. Ministrja Yolanda Díaz, përfaqësuese e partisë së majtë Sumar, e cilësoi masën si një hap përpara në drejtim të modernizimit të marrëdhënieve të punës dhe rritjes së kënaqësisë qytetare.

Ndryshimi tashmë është zbatuar për punonjësit e administratës publike dhe disa sektorë shtetërorë, por me ligjin e ri do të zgjerohet në fusha të rëndësishme si tregtia me pakicë, mikpritja, ndërtimi dhe industria përpunuese – sektorë që zënë një pjesë të konsiderueshme të fuqisë punëtore. Iniciativa ka hasur në mbështetjen e sindikatave të mëdha, ndërsa është pritur me skepticizëm nga përfaqësuesit e botës së biznesit.

Që nga viti 1983, kur orari javor i punës u reduktua nga 48 në 40 orë, nuk ka pasur ndërhyrje të tjera të mëdha në këtë drejtim. Projektligji i tanishëm mbështetet edhe nga rezultatet pozitive të eksperimenteve të kohëve të fundit, përfshirë një projekt pilot në Valencia pas pandemisë, ku u testua një javë pune katërditore. Sipas të dhënave, punonjësit raportuan më pak stres dhe një stil jetese më të shëndetshëm.b.w.