FA dhe FSK, trajnime të përbashkëta për operacione në ujë në Pashaliman

Kompania e Kërkim-Shpëtimit e Regjimentit të Mbrojtjes Civile të Forcës së Sigurisë së Kosovës (FSK) ka zhvilluar së fundmi një trajnim të përbashkët me Forcat e Armatosura të Republikës së Shqipërisë (FARSH) në fushën e zhytjes.

Trajnimi u mbajt në Qendrën e Zhytjes në Pashaliman, Vlorë.

Sipas FSK-së, kjo iniciativë reflekton rëndësinë e forcimit të bashkëpunimit ndërmjet institucioneve ushtarake të Kosovës dhe Shqipërisë, duke treguar gjithashtu përkushtimin e përbashkët për zhvillimin e kapaciteteve të specializuara dhe përmirësimin e aftësive në operacione ujore, në përputhje me standardet ndërkombëtare.

Ky aktivitet vjen si pjesë e marrëveshjes bilaterale të bashkëpunimit midis dy forcave, që synon të rrisë gatishmërinë dhe koordinimin në situata emergjente.