Djali i Gianluigi Buffonit debuton në Serie A me Pisën

Louis Thomas Buffon, djali i legjendarit ish-portier të Italisë dhe Juventusit, Gianluigi Buffon, bëri debutimin e tij në Serie A të dielën pasdite, duke hyrë nga stoli në pjesën e dytë të humbjes 4-0 të Pisës ndaj Bolognas.

Tridhjetë vjet pas debutimit të Gianluigi Buffon në Serie A, edhe i biri, Thomas, ka bërë tashmë paraqitjen e tij të parë në elitën e futbollit italian, megjithëse si zëvendësues i vonë në një humbje të thellë 4-0 në “Dall’Ara”.

Louis Buffon, i cili është pjesë e klubit Pisa që nga viti 2023, ishte përfshirë në listën e rezervave për ndeshjen kundër Bolognas. Skuadra e tij mbeti me 10 lojtarë pas minutës së 36-të, çka çoi në një dominim të plotë të kundërshtarëve: Nicolo Cambiaghi, Nikola Moro, Riccardo Orsolini dhe Jens Odgaard shënuan golat.

Me Bolognan që udhëhiqte me katër gola dhe me ndeshjen praktikisht të mbyllur në minutën e 53-të, trajneri Alberto Gilardino vendosi t’i jepte 17-vjeçarit Louis Buffon mundësinë për debutim në Serie A, duke e futur në lojë në minutën e 77-të në vend të M’Bala Nzola-s.

Adoleshenti është sulmues, zakonisht luan si anësor, megjithatë kundër Bolognas u aktivizua pak më në qendër gjatë 15 minutave që ishte në fushë.

17-vjeçari ka zhvilluar tre ndeshje me përfaqësueset e moshave të Çekisë, pasi është i aftë të përfaqësojë këtë vend nëpërmjet nënës së tij. Megjithatë, ai mbetet ende i kualifikuar për të përfaqësuar Italinë në nivele të ndryshme të moshave.