Policë të shumtë, kuaj, qenë e dronë, siguri “deri në dhëmbë” për ndeshjen Aston Villa – Maccabi

Pranë stadiumit “Villa Park” pritet të zhvillohen protesta, pasi është marrë vendimi që tifozët mysafirë të Maccabi Tel Aviv të mos lejohen të marrin pjesë në ndeshje.

Maccabi është skuadra e vetme izraelite që është kualifikuar në fazën kryesore të një gare evropiane këtë sezon, dhe shqetësimet nisën menjëherë pas shortit, kur ata u caktuan të udhëtojnë në Birmingham për t’u përballur me Aston Villën.

Ka pasur kërkesa që ekipet izraelite të përjashtohen nga garat evropiane për shkak të konfliktit, por pas shpalljes së një armëpushimi në tetor, Maccabi mori lejen për të vazhduar pjesëmarrjen në Europa League. Megjithatë, polemikat lindën nga vendimi për të ndaluar udhëtimin e tifozëve izraelitë në Angli.

Grupi Lokal i Sigurisë (SAG), i cili përcakton nevojat për praninë policore dhe kufizimet e mundshme të turmës, u informua nga Policia e West Midlands se ndeshja u vlerësua si “rrezik i lartë”, duke rekomanduar që tifozët e Maccabi-t të mos lejohen të marrin pjesë për arsye sigurie.

Sipas policisë, ky vendim u bazua në “informacione aktuale dhe incidente të mëparshme”, duke përfshirë “përleshje të dhunshme dhe shkelje të urrejtjes” që ndodhën gjatë ndeshjes së Maccabi-t ndaj Ajax në Europa League vitin e kaluar.

Vendimi ka shkaktuar kritika të gjera publike, përfshirë edhe nga kryeministri britanik Keir Starmer, i cili nuk është pajtuar me ndalimin.

Për ndeshjen e mbrëmjes së sotme janë angazhuar rreth 700 oficerë policie, që do të monitorojnë zonën nga ambientet e stadiumit deri te stacionet lokale të trenit.

Stacionet Aston dhe Witton do të jenë nën mbikëqyrje të autoriteteve, ndërsa do të përdoren edhe qen, kuaj dhe njësi dronësh për siguri shtesë.

Policia ka konfirmuar se do të përdorë kompetencat e Nenit 60, që lejojnë oficerët të ndalojnë dhe kontrollojnë këdo në zonën përreth pa pasur nevojë për arsye të arsyeshme.

Për shkak të protestave të paralajmëruara para fillimit të ndeshjes në orën 20:00, disa shkolla në Birmingham do të mbyllen më herët.

Protestat pritet të organizohen nga disa grupe pro-palestineze, të cilat kërkojnë që ndeshja të anulohet.

Në mesin e tyre janë organizatat: Palestine Solidarity Campaign, Stop the War Coalition, Muslim Association of Britain, Friends of Al-Aqsa, Kashmir Solidarity Campaign dhe Palestinian Forum in Britain.

Policia e West Midlands njoftoi gjithashtu në rrjete sociale se “do të kryhen kontrolle të shumta biletash në qasjen drejt stadiumit”.