Osmani falënderon ushtarët amerikanë në Bondsteel në Ditën e Falënderimeve

Presidentja e Kosovës, Vjosa Osmani, ka shprehur mirënjohjen e saj për ushtarët amerikanë me rastin e Ditës së Falënderimeve, duke theksuar rolin e tyre të pandërprerë në mbështetjen e vendit.

Në një postim, Osmani tha se ushtarët e SHBA-së kanë qenë pranë Kosovës “në ditët më të vështira dhe në ditët më të mira për popullin tonë”.

Ajo njoftoi se sot ka vizituar kampin Bondsteel, ku u është bashkuar trupave amerikane për t’i falënderuar për kontributin e tyre në paqe dhe siguri në Kosovë dhe rajon.

“Sot, në Festën e Falënderimeve, pata nderin t’u bashkohem sërish në kampin Bondsteel për t’ua shprehur mirënjohjen tonë,” ka shkruar Presidentja.