Stadiumi i Shtimes shndërrohet në arenë moderne, investohen rreth 2.5 milionë euro

Ministri në detyrë i Kulturës, Rinisë dhe Sportit, Hajrulla Çeku tha se tashmë ky stadium ka arritur standardet që kërkohet për zhvillim të ndeshjeve profesionale. 

“Besoj që këtu është arritur një standard çfarë kërkohet për t’i zhvilluar ndeshjet profesionale zyrtare kjo është pjesë e investimeve që qeveria po bënë gjithandej Kosovës për konsolidimin e infrastrukturës së futbollit, ky stadium u transofrmua tashmë i plotëson kushtet në shërbim të futbollistëve dhe të publikut. Vazhdojmë edhe me shumë investime tjera gjithandej Kosovës në mënyrë qe brenda pak viteve  vendi ynë ta ketë infrastrukturën më të avancuar të futbollit në rajon”, tha ai. 

Kryetari i komunës së Shtimes, Qemajl Aliu, rindërtimin e këtij stadiumi e quajti veprën më të  madhe e ndërtuar në komunën që ai udhëheqë.

“Me përuruar njërën nga veprat më të mëdha që është ndërtuar në Komunën e Shtimes stadiumi modern i qyteti falënderoj ministrin dhe kryeministrin për kujdesin dhe vëmendjen qe kanë për Shtimen dhe qytetarët”, tha ai.

Rindërtimi i stadiumit të qytetit të Shtimes është realizuar në kuadër të investimeve publike për përmirësimin e infrastrukturës sportive në Kosovë. Projekti ka përfshirë ndërtimin e tribunave të reja, rregullimin e fushës dhe përmirësimin e kushteve teknike, me qëllim krijimin e një ambienti funksional për zhvillimin e ndeshjeve dhe aktiviteteve sportive. 

Punimet kanë zgjatur rreth një vit e gjysmë dhe investimi kap vlerën afërsisht 2.5 milionë euro. Stadiumi pritet të shërbejë për klubin futbollistik “Vjosa”, si dhe për aktivitete të tjera sportive e komunitare, duke rritur qasjen e qytetarëve në sport dhe rekreacion./B.Ibishi/