Largimi i të rinjve nga Kosova/ Eksperti Bellaqa: Një pjesë e madhe e të rinjve në Kosovë janë të arsimuar dhe të përgatitur profesionalisht

Eksperti i ekonomisë, Jakup Bellaqa, ka theksuar se arsyet kryesore të largimit të të rinjve nga Kosova janë të natyrës ekonomike dhe mungesa e stabilitetit në punësim.

Sipas tij, “të rinjtë tanë po largohen sepse nuk ka qëndrueshmëri ekonomike dhe mungon siguria në tregun e punës”.

Bellaqa ka shtuar se një pjesë e madhe e të rinjve në Kosovë janë të arsimuar dhe të përgatitur profesionalisht.

Jakup Bellaqa

“Do të duhej të krijoheshin kushte që ata të kryenin edhe përvoja praktike në bizneset e Kosovës, në mënyrë që të jenë të përgatitur për tregun e punës dhe të krijojnë jetën e tyre socio-ekonomike, si të punësuar apo edhe si punëdhënës”, është shprehur Bellaqa.

Duke folur për integrimin e të rinjve jashtë vendit, ai ka vlerësuar se ata përshtaten lehtë në tregjet e huaja.

“A mund të integrohen të rinjtë lehtë jashtë Kosovës? Sigurisht që po, sepse ata janë të arsimuar dhe të përgatitur për tregun e punës dhe u ofrojnë punëdhënësve produktivitet si në ekonominë e prekshme ashtu edhe në atë të paprekshme”, ka deklaruar ai.

Sipas Bellaqës, kjo përgatitje u mundëson atyre të përmbushin standardet evropiane të punës.

“Në këtë rast, puna e tyre sjell përfitime të mëdha ekonomike dhe sociale, duke siguruar mirëqenie për veten dhe familjet e tyre”, ka përfunduar eksperti i ekonomisë.