Gashi do të votojë për dorëheqjen e Abdixhikut, i lumtur për kandidaturën e Hotit

Deputeti i LDK-së mbështet ndryshimet në parti dhe thotë se kandidatura e Avdullah Hotit është e mirëseardhur.

Deputeti i Lidhjes Demokratike të Kosovës, Arben Gashi, ka deklaruar se do të votojë “për” dorëheqjen e Lumir Abdixhikut nga pozita e kryetarit të partisë, duke theksuar se LDK-ja ka nevojë për ndryshim.

Në një prononcim për “Indeksonline”, ai bëri të ditur se pika e parë e rendit të ditës në mbledhjen e partisë do të jetë votëbesimi, përkatësisht dorëheqja e kryetarit aktual, e më pas do të diskutohen çështje të tjera.

“Pika e parë e rendit të ditës është votëbesimi apo dorëheqja e kryetarit aktual, pastaj kalojmë në çështje tjera”, tha Gashi.

Duke folur për kandidaturën e Avdullah Hotit për drejtimin e LDK-së, ai u shpreh pozitivisht, duke e cilësuar atë si të mirëseardhur.

“Do ta diskutojmë aty, por unë do ta miratoj dorëheqjen e tij. Jam pro një ndryshimi brenda Lidhjes Demokratike të Kosovës”, deklaroi Gashi.