‘Hyrja e Kosovës në NATO, mbyllje e derës për Serbinë për destabilizim e kërcënim’

Profesori universitar Dorejet Imeri ka shkruar për çështjen e anëtarësimit të Kosovës në NATO, e cila konsiderohet një nga synimet më të rëndësishme strategjike të shtetit të Kosovës, raporton KosovaPost.

Postimi i plotë:

Hyrja e Kosovës në NATO, mbyllje e derës për Serbinë për destabilizim e kërcënim

Anëtarësimi i Kosovës në NATO është një nga synimet më të rëndësishme strategjike të shtetit të Kosovës, sepse lidhet drejtpërdrejt me historinë dhe raportin që ka shteti i ri me aleancën më të fuqishme në botë, lidhet me sigurinë kombëtare dhe rajonale, por edhe me kontributin për paqe. Ka edhe mendime se kjo do të konsiderohej edhe si një formë e avancuar e konsolidimit plotë të shtetësisë.
Historia e Kosovës është e lidhur ngushtë me NATO-n, veçanërisht për faktin se ishte ndërhyja e kësaj organizate ajo që i dha fund luftës dhe e ndaloi spastrimin etnik dhe gjenocidin në Kosovë. Që atëherë, por edhe paraprakisht, NATO, është ideali i sigurisë së Kosovë. Që nga ajo kohë, prania e NATO-s përmes KFOR-it ka qenë faktor kyç për ruajtjen e sigurisë dhe stabilitetit në vend dhe partnere besnik e avancimit dhe funksionalzimit të plotë të kapaciteteve të FSK-së, ushtrisë së Kosovës.
Siguria është një nga arsyet kryesore pse anëtarësimi në NATO është jetik për Kosovën. Si një shtet i ri, i përballur ende me kërcënime të çdollojshme nga Serbia, Kosova ka nevojë për garanci afatgjata sigurie. Anëtarësimi në NATO do të nënkuptonte mbrojtje kolektive dhe do të zvogëlonte ndjeshëm rrezikun e destabilizimit, cenueshmërinë territoriale dhe forma të tjera të ndërhyrjeve nga jashtë. Në këtë kontekst, kongresmeni amerikan Keith Self ka theksuar se Ballkani mbetet një rajon me siguri delikate, duke e quajtur “fuçi baruti”, dhe ka argumentuar se anëtarësimi i Kosovës në NATO do të ishte një element kyç stabilizues për rajonin.
Kosova nuk do të ishte vetëm përfituese e sigurisë, por edhe kontribuese për paqen. Anëtarësimi në NATO do t’i mundësonte Kosovës të marrë pjesë në misione paqeruajtëse dhe në iniciativa ndërkombëtare të sigurisë, duke u shndërruar nga një vend që ka nevojë për mbrojtje në një vend që kontribuon në stabilitetin ndërkombëtar. Ky rol do ta forconte pozitën e Kosovës si shtet përgjegjës dhe i besueshëm në arenën globale.
Po ashtu, anëtarësimi në NATO do të kishte një rëndësi të veçantë për përmbylljen e shtetësisë së Kosovës. Ai do ta forconte subjektivitetin ndërkombëtar të saj, prandaj anëtarësimi i Kosovës në NATO është kaq i rëndësishëm sepse përmbledh në vetvete sigurinë, paqen, stabilitetin rajonal dhe konsolidimin e shtetit. Ai do ta mbyllte një kapitull historik të pasigurisë dhe do ta hapte një kapitull të ri të integrimit euroatlantik, duke e pozicionuar Kosovën si një faktor stabilizues dhe paqedashës në Ballkan dhe më gjerë.