Dje nuk kishte problem se Lista Serbe “është terroriste”, thotë Jashari

Analisti Shemsi Jashari ka komentuar zhvillimet e fundit në Kuvendin e Kosovës, duke e cilësuar si “vit të humbur”, vitin 2025.

Në FIVE në TV Dukagjini, Jashari deklaroi se retorika e Vetëvendosjes ndaj Listës Serbe gjatë vitit të kaluar është shoqëruar me narrativa patriotike, ndërsa sipas tij, veprimet konkrete kanë treguar të kundërtën të mëkurën mbrëma.

“Është thjesht një vit i humbur. Dhe mbrëmë ajo çka pamë është se kur ka vullnet, zgjidhja është shumë e lehë. Arsyeje kryesore pse është mbështjellë me narrativë patriotike se Lista Serbe është problem, për shkak të kaluarës saj dhe sfondit të saj, dyshimit për involvimin e saj dhe përfaqësuesve të saj në aktivitete terroriste. Kërkesat populliste për shpalljen organizatë terroriste dje nuk ishte problem. D.m.th. një vit i humbur kaloi me aq lehtësi. Po i njëjti lider i Listës Serbe votohet nënkryetar i Kuvendit. Dhe nuk paraqet problem. Përderisa nuk ka ndryshuar asgjë aspër Listën Serbe e as e kaluara e këtyre përfaqësuesve”, ka thënë Jashari.

Mbrëmë është konstituar legjislatura e re, kur janë zgjedhur edhe nënkryetarët e rinj. Përmes votimit në pako, deputetët zgjodhën Ardian Golën nga Lëvizja Vetëvendosje, Vlora Çitakun nga Partia Demokratike e Kosovës, Kujtim Shalën nga Lidhja Demokratike e Kosovës, Emilja Rexhepin nga grupi multietnik dhe Sllavko Simiqin nga Lista Serbe.

Kandidatët për nënkryetarë morën mbështetjen e 104 deputetëve, ndërsa tre deputetë votuan kundër dhe gjashtë abstenuan.