FIFA ka hedhur poshtë një propozim të diskutueshëm për zëvendësimin e Iranit me Italinë në Kupën e Botës 2026, duke konfirmuar se nuk ka asnjë plan për të ndryshuar përbërjen e ekipeve pjesëmarrëse.
Ideja ishte paraqitur nga Paolo Zampolli, i dërguar i posaçëm i administratës amerikane dhe mik i afërt i ish-presidentit amerikan Donald Trump, i cili sugjeroi që Italia, pavarësisht se nuk është kualifikuar, të marrë pjesë në turne në vend të Iranit.
Ai kishte argumentuar se përvoja dhe historia e katër titujve botërorë të Italisë e justifikonin një vend të tillë.
Megjithatë, FIFA e ka refuzuar këtë kërkesë, duke theksuar se çdo zëvendësim eventual duhet të vijë nga e njëjta konfederatë, çka në këtë rast përjashton një ekip europian si Italia.
Ndërkohë, autoritetet italiane kanë reaguar ashpër ndaj këtij propozimi. Ministri i Sportit i Italisë e ka cilësuar atë si “jo të përshtatshëm”, duke theksuar se pjesëmarrja në Kupën e Botës fitohet vetëm në fushë, përmes meritës sportive.
Propozimi ka ardhur në një kontekst tensionesh gjeopolitike mes Iranit dhe Shteteve të Bashkuara, duke nxitur spekulime për pjesëmarrjen e ekipit iranian.
Megjithatë, FIFA ka konfirmuar se Irani do të marrë pjesë normalisht në turne dhe se nuk ekziston asnjë “plan B” për zëvendësimin e tij.
Të tjera
Shenjat se ke rënë “qetësisht” në depresion
Sllovenia do të transmetojë filma për Palestinën në vend të Eurovision
Afati po skadon, ende s`ka marrëveshje për president