FIFA e refuzon kërkesën e Francës për largimin e kartonit të Olises

Didier Deschamps ka konfirmuar se Michael Olise do të mbetet me kartonin e verdhë për çerekfinalen e Kupës së Botës ndaj Marokut, pasi FIFA ka refuzuar ankesën zyrtare të paraqitur nga Federata Franceze e Futbollit.

Vendimi vjen në kontrast me rastin e sulmuesit të Shteteve të Bashkuara, Folarin Balogun, të cilit FIFA i pezulloi dënimin me karton të kuq, duke shkaktuar pakënaqësi te kampi francez.

Në konferencën për shtyp të së mërkurës, Deschamps zbuloi se Franca kishte kërkuar anulimin e kartonit të verdhë që Olise mori në ndeshjen e 1/8 së finales ndaj Paraguait.

Sulmuesi u ndëshkua në minutat e fundit pas një dueli me Matias Galarzan.

Pamjet televizive treguan se Olise e tërhoqi fanellën e futbollistit paraguajan, por nuk e goditi, edhe pse ky i fundit u rrëzua në tokë duke shfaqur shenja dhimbjeje.

Olise ka qenë një nga lojtarët më të rëndësishëm të Francës në këtë Kupë të Botës, duke luajtur në të gjitha ndeshjet dhe duke dhuruar pesë asistime.

Megjithatë, ankesa e Federatës Franceze nuk u pranua dhe kartoni i verdhë mbetet në fuqi.

“Kartoni i verdhë nuk ka ndryshuar. Këtë mëngjes morëm njoftimin nga FIFA,” deklaroi Deschamps.

Refuzimi i kërkesës së Francës vjen vetëm pak ditë pasi FIFA vendosi në mënyrë kontroverse të pezullojë dënimin e Folarin Balogun.

Sulmuesi amerikan ishte përjashtuar me karton të kuq ndaj Bosnjë e Hercegovinës, por pezullimi i tij u shty përpara ndeshjes së 1/8 së finales, duke i mundësuar të luante ndaj Belgjikës.

Megjithatë, SHBA u mposht bindshëm 4-1 nga Belgjika, e cila tani do të përballet me Spanjën në çerekfinale.

Fituesi i kësaj sfide do të luajë në gjysmëfinale me fituesin e përballjes Francë–Marok, çka e bën edhe më të ndjeshme çështjen e vendimit ndaj Olise.

Megjithatë, Deschamps theksoi se skuadra e tij është e përqendruar fillimisht te Maroku dhe paralajmëroi lojtarët e tij të mos e nënvlerësojnë kundërshtarin.

“Sa i përket ndeshjes, Maroku nuk është Paraguai. Ne u përballëm me ta katër vite më parë. Ata arritën në finalen e Kupës së Kombeve të Afrikës. Kanë lojtarë shumë të mirë, janë një skuadër që pëlqen ta mbajë topin dhe të sulmojë. Kanë cilësi shumë të mëdha,” u shpreh trajneri francez.

Olise do të duhet të jetë i kujdesshëm në përballjen ndaj Marokut, pasi një tjetër karton i verdhë do ta pezullonte për një gjysmëfinale të mundshme./GazetaExpress/