Albin Kurti në skenën evropiane: Çfarë përfiton realisht Kosova?

Pjesëmarrja e kryeministrit në detyrë të Kosovës, Albin Kurti, në samitin e Komunitetit Politik Evropian në Jerevan po konsiderohet një hap i rëndësishëm për përfaqësimin ndërkombëtar të vendit, ndonëse jo pa dilema mbi fuqinë e këtij përfaqësimi.

Në këtë forum, që mbledh rreth 50 liderë nga e gjithë Evropa për të diskutuar sfidat kryesore të kontinentit, Kosova po përfaqësohet nga një qeveri në detyrë. Sipas njohësve të diplomacisë, kjo situatë ka si anë pozitive praninë e shtetit në tryeza ndërkombëtare, por njëkohësisht kufizon kapacitetin për vendimmarrje dhe marrëveshje konkrete.

Sipas tij, prezenca e Kosovës në një forum gjithëpërfshirës evropian është e domosdoshme, sidomos në kontekstin kur disa shtete ende nuk e kanë njohur pavarësinë e saj. Ai shton se samite të tilla ofrojnë mundësi për takime bilaterale dhe multilaterale, të cilat mund të jenë të dobishme për avancimin e interesave shtetërore.

Megjithatë, Canaj vlerëson se fakti që vendi përfaqësohet nga një qeveri në detyrë i bën shtetet e tjera më të rezervuara, pasi mungon një mandat i plotë për të marrë dhe zbatuar marrëveshje.

“Nëse flasim se çka mund të përfitojë Kosova nga një kryeministër në detyrë, e para aty nuk merren vendime që do të jenë obligative, por vetë prezenca është e rëndësishme. Tash për tash Kurti është kryeministër në detyrë dhe absolutisht nuk mund të thuhet se s’ka legjitimitet… A është mirë që është Kosova aty? Po, absolutisht, për shkak se sido që të jetë vetë prezenca e shtetit të Kosovës tregon shumë, për shkak se ne kemi shumë shtete që nuk na kanë njohur. Samiti nuk organizohet vetëm për shtetet e BE-së, por për tërë Evropën dhe mund të ndodhë që aty mund të ketë takim bilateral, por edhe multilateral… Shtetet e tjera janë më të rezervuara pasi ne faktikisht kemi një qeveri në detyrë dhe jo një qeveri fuqiplotë me të cilën mund të bëhen marrëveshjet dhe pastaj të pritet të implementohen. Kjo është e keqja”, deklaron Canaj.