Biden i bën thirrje Hamasit të ‘dëshmojë’ se dëshiron armëpushim

Presidenti amerikan Joe Biden i ka bërë thirrje Hamasit të ‘dëshmojë’ se dëshiron t’i japë fund luftimeve në Gaza duke pranuar marrëveshjen e armëpushimit që u miratua dje nga Këshilli i Sigurimit i OKB-së.

“Këshilli i Sigurimit i OKB-së sapo miratoi rezolutën tonë që i bën thirrje Hamasit të pranojë marrëveshjen për të vendosur një armëpushim me lirimin e pengjeve”, shkroi Biden në X.

“Hamasi thotë se dëshiron një armëpushim. Kjo marrëveshje është një mundësi për të dëshmuar se ata e duan këtë”.

Hamasi lëshoi një deklaratë duke përshëndetur rezolutën e OKB-së pak pasi ajo kaloi, duke thënë se ishte gati të bashkëpunonte me ndërmjetësit për zbatimin e parimeve të planit.

Marrëveshja – e përshkruar nga zoti Biden në fund të majit – do të ndodhte në tri faza.

Faza e parë e marrëveshjes do të ishte një armëpushim gjashtëjavor, e dyta kthimi i pengjeve të mbetura nga Gaza dhe e treta dhe e fundit, një plan rindërtimi për Gazën.

Ajo kaloi me 14 vota pro dhe vetëm Rusia abstenoi nga votimi.