Dugolli “godet” Abdixhikun: Qeveria tranzitore është “Frankenshtajn politik”

Ish-deputeti i Lëvizjes Vetëvendosje, Enver Dugolli, ka reaguar ashpër ndaj kryetarit të LDK-së, Lumir Abdixhiku, pas propozimit të këtij të fundit për krijimin e një qeverie tranzitore dhe unifikuese. Dugolli e ka cilësuar këtë ide si një “Frankenshtajn politik” që i përket të kaluarës.

“Ky Lumiri po duket sikur ka pranë vetes një mësues të keq që nuk e lë të ecë përpara. Edhe kur Lëvizja Vetëvendosje e fton të ecim bashkë drejt së ardhmes, ai merakoset për PDK-në dhe AAK-në, sepse hallin e ka se mos po mbesin prapa!”, ka shkruar Dugolli në një reagim publik.

Postimi i plotë:

Ky Lumiri po duket sikur ka pranë vetes një “mësues të keq” që nuk e lë të ecë përpara. Edhe kur Lëvizja Vetëvendosje e fton të ecim bashkë drejt së ardhmes, ai merakoset për PDK-në dhe AAK-në sepse hallin e ka se mos po mbesin prapa!

Të refuzosh ftesën e LV-së dhe të dalësh me propozim për një qeveri teknike apo tranzicionale, një “Frankenshtajn politik”, 26 vjet pas luftës, është, për të thënë më së buti, një marrëzi e llojit të vetë!

Lëvizja VETËVENDOSJE! ka fituar mbi 42% të votave, dhe këtë fakt nuk mund ta ktheni mbrapa. Sa më shpejt ta kuptoni këtë, aq më mirë do të jetë për ty Lumir, dhe për të gjithë të tjerët qe ende nuk po munden ta kuptojnë dhe pranojnë.