Aktuale, Lajme

Evitimi i zgjedhjeve të reja, Murati jep propozimin pak para se të nisë seanca konstituive

Posted on by botaelajmeve

Ministri në detyrë i Financave, Hekuran Murati ka folur rreth situatës së krijuar për konstituimin e Kuvendit.

Murati thotë se verifikimi i mandateve është hedhur në votim dhe është refuzuar si rezultat i votave të PDK, LDK, AAK, dhe Listës Serbe, transmeton Telegrafi.

“Po më duket që disa ende nuk e kanë të qartë se çfarë ka bërë opozita me 15 prill. Raporti për verifikim të mandateve më 15 prill, u hodh në votim, dhe u refuzua si rezultat i votave të PDK, LDK, AAK, dhe Listës Serbe. Një çështje për të cilën Kuvendi ka vendimmarrje, nuk mund të hidhet në rivotim. Votimi është konsumuar”, sqaroi ai.
Tutje, Murati shtoi se “në rivotim çështja hidhet vetëm nëse herën e parë nuk ka pasur kuorum për vendimmarrje, siç ka qenë rasti në vitin 2014, me vetëm 44 deputetë që kanë marrë pjesë në votim herën e parë”.

Murati tha se një  refuzim i tillë sikurse ky i partive të opozitës, nuk ka ndodhur asnjëherë.

Ai ka bërë një sugjerim se si të kalohet nga kjo gjendje, në mënyrë që mos të ketë zgjedhje të reja.

“Praktikisht, kjo i bie se deputetët kanë refuzuar mandatin, dhe procesi duhet të kthehet në pikën zero – pra një proces i ri zgjedhor i cili prodhon një legjislaturë të re e cila, ka sensin që të pranojë mandatin e dhënë nga populli.

E vetmja rrugë tjetër për të evituar skenarin e zgjedhjeve të reja, është një dakordim unanim politik, ku vetëm deputetët që kanë refuzuar mandatin me votën e tyre, tërhiqen dhe ua lëshojnë vendin e tyre kolegëve tjerë nga i njëjti subjekt. Një gjë e ngjashme kishtë ndodhur në legjislaturën që lamë pas me deputetët e Listës Serbe”, deklaroi ai.