Hoti: RTK-ja nuk duhet të mbetet pa buxhet, edhe pa Kuvend funksional

Ish-kryeministri Avdullah Hoti ka reaguar lidhur me situatën e financimit të RTK-së, duke theksuar se pavarësisht mungesës së një Kuvendi funksional, alokimi i përkohshëm i buxhetit për këtë medium publik është i mundshëm dhe ligjërisht i mbështetur.

Ai në një postim në Facebook, rikujtoi se në janar të vitit 2021, si qeveri në detyrë, kishin marrë një vendim të tillë për RTK-në, duke u bazuar në Ligjin për ndarjet buxhetore.

Sipas tij, ekziston precedent dhe fondet për RTK-në janë të ndara tashmë në buxhetin për vitin 2025.

Hoti kritikoi Qeverinë Kurti për moszgjidhjen e çështjes së financimit të RTK-së gjatë pesë viteve në pushtet dhe për zvogëlimin e buxhetit të këtij institucioni nga 11.2 milionë euro në 8.9 milionë euro që nga viti 2022.

Ai kërkoi që Kuvendi i ardhshëm të ofrojë një zgjidhje të qëndrueshme për financimin e RTK-së, të sigurojë pavarësinë e saj nga politika dhe të miratojë një plan strategjik për zhvillimin e saj profesional dhe teknologjik.