Kallas: BE drejt vendosjes së taksave mbi mallrat izraelite

Kallas, ka konfirmuar se Komisioni Evropian po shqyrton pezullimin e dispozitave tregtare që Izraeli gëzon nga Marrëveshja e Asociimit me BE-në.

Sipas saj, trajtimi preferencial aktualisht përfshin rreth 37% të vëllimit tregtar midis dy palëve, i cili në vitin 2024 arriti në 42.6 miliardë euro. “Ky hap padyshim do të ketë një kosto të lartë për Izraelin”, deklaroi Kallas.

Presidentja e Komisionit Evropian, Ursula von der Leyen, e paralajmëroi këtë masë javën e kaluar gjatë fjalimit të saj për Gjendjen e BE-së, duke theksuar shqetësimet humanitare të shkaktuara nga lufta në Gaza dhe politikat e Izraelit në Bregun Perëndimor. Ajo gjithashtu njoftoi pezullimin e mbështetjes direkte për Izraelin, përveç fondeve të dedikuara për shoqërinë civile dhe memorialin e Holokaustit Yad Vashem.

Vendimi pritet të miratohet nga Komisioni dhe më pas kërkon aprovimin e shumicës së shteteve anëtare të BE-së. Megjithatë, disa vende kanë shprehur rezerva, duke shkaktuar bllokim në nivelin e unionit.

“Në Këshillin e Punëve të Jashtme patëm diskutime shumë intensive. Nëse të gjithë bien dakord se situata në Gaza është katastrofike dhe e papërballueshme, atëherë pyetja është: çfarë bëjmë për këtë?”, u shpreh Kallas, duke shtuar se në rast se masat e propozuara nuk gjejnë mbështetje, vendet skeptike duhet të sjellin alternativa konkrete.

Nëse vendimi hyn në fuqi, ai pritet të shënojë një nga lëvizjet më të forta ekonomike të BE-së ndaj Izraelit gjatë konfliktit në Gaza.

The post Kallas: BE drejt vendosjes së taksave mbi mallrat izraelite appeared first on Kosovapost.net.