Kapet në Jarinjë një serb me 10 mijë euro të padeklaruara

Gjatë kontrollit të një automjeti në pikën kufitare të Jarinjës, të premten janë zbuluar mbi 10 mijë euro mjete monetare të padeklaruara.

Sipas raportit 24-orësh të Policisë së Kosovës, automjeti me targa të Serbisë është selektuar për kontroll të detajuar në vijën e dytë gjatë hyrjes në Republikën e Kosovës.

“Me datë 18.12.2025, në hyrje të RKS-së është selektuar për vijën e dytë të kontrollit një automjet me targa të Serbisë, të cilin e drejtonte i dyshuari mashkull serb. Gjatë kontrollit, janë gjetur mjete monetare të padeklaruara në euro dhe dinarë, në vlerë totale prej 10,206.84 euro”, thuhet në njoftimin e Policisë.

Lidhur me rastin, për procedura të mëtejme është angazhuar Dogana e Kosovës, ndërsa rasti do të trajtohet sipas procedurave ligjore në fuqi.