Oficer profesionist, atdhetar i jashtëzakonshëm dhe bashkëpunëtor i Presidentit Rugova

Presidentja e Republikës së Kosovës, Vjosa Osmani, ka përkujtuar sot me respekt dhe nderim 23-vjetorin e vrasjes së ushtarakut të Ushtrisë Çlirimtare të Kosovës, kolonel Tahir Zemaj, së bashku me të birin Enisin dhe kushëririn Hasanin, transmeton KosovaPost.

Në një reagim publik, Presidentja Osmani e ka përshkruar kolonel Zemajn si një oficer profesionist, atdhetar i jashtëzakonshëm dhe luftëtar të lirisë, si dhe si një bashkëpunëtor të afërt të Presidentit historik Dr. Ibrahim Rugova.

“Kolonel Zemaj ishte oficer profesionist, atdhetar i jashtëzakonshëm, luftëtar i lirisë dhe bashkëpunëtor i afërt i Presidentit historik Dr. Ibrahim Rugova,” ka thënë Presidentja Osmani.

Presidentja ka theksuar se vrasja e tij, bashkë me familjarët, mbetet plagë e hapur dhe kujtesë e dhimbshme për shoqërinë kosovare, duke rikujtuar se drejtësia për disa krime të mëdha ende pret të realizohet.

“Vrasja e tij mbetet plagë e hapur dhe kujtesë e dhimbshme se drejtësia për disa krime ende pret,” ka deklaruar Osmani.

Sipas Presidentes Osmani, kujtimi i kolonel Zemajt dhe familjarëve të tij është një obligim moral dhe institucional për të vërtetën, drejtësinë dhe për Kosovën që ata ëndërruan dhe luftuan.

“Kujtimi për kolonel Zemajn dhe familjarët e tij është obligim moral dhe institucional për të vërtetën, për drejtësinë dhe për Kosovën që ata ëndërruan e luftuan,” ka theksuar ajo.

Në përmbyllje të mesazhit të saj, Presidentja Osmani ka nderuar jetën dhe veprën e kolonel Tahir Zemajt, Enisit dhe Hasanit, duke shprehur respektin e thellë për kontributin e tyre në lirinë dhe të ardhmen e vendit.

“Lavdi jetës dhe veprës së kolonel Tahir Zemajt, Enisit dhe Hasanit!”