Bota

Polonia paralajmëron: Arrestimi i Putinit nëse kalon hapësirën tonë ajrore

Posted on by botaelajmeve

Polonia paralajmëroi presidentin rus, Vladimir Putin që të mos fluturojë përmes hapësirës së saj ajrore për të marrë pjesë në samitin e planifikuar në Hungari me homologun amerikan, Donald Trump.

Autoritetet polake njoftuan se në rast se Putini shkel territorin ajror polak, do të detyrohen të zbatojnë një urdhër arresti ndërkombëtar, raporton reuters.

Ndryshe, Bullgaria u shpreh e gatshme të lejojë fluturimin e Putinit në hapësirën e saj ajrore gjatë rrugës për në Hungari, sipas ministrit të Jashtëm bullgar, Georg Georgiev.

Trump, javën e kaluar, foli për mundësinë e një takimi me Putinin në Budapest, ndërsa përpiqet të ndërmjetësojë një paqe që do të ndalojë luftën. Gjykata Ndërkombëtare Penale (GJNP) ka nxjerrë urdhër arresti ndaj Putinit, duke e akuzuar për deportim të paligjshëm të fëmijëve nga Ukraina. Rusia refuzon të njohë juridiksionin e GJNP-së dhe hedh poshtë këto akuza.

Urdhri i GJNP-së kërkon nga të gjitha shtetet anëtare të arrestojnë Putinin nëse ai kalon në territorin e tyre. Sikorski shprehu shpresën që nëse samiti zhvillohet me sukses dhe me praninë e Putinit, aeroplani i tij do të marrë një rrugë alternative për të shmangur përplasjen me ligjin.

Kryeministri hungarez, Viktor Orban ka marrëdhënie më të ngushta me Rusinë se sa me shumë vende të Bashkimit Evropian. Autoritetet e Budapestit kanë premtuar se do të sigurojnë pjesëmarrjen e Putinit në samit dhe kthimin e tij në Moskë.

Për të shmangur fluturimin mbi Hungarinë, delegacioni rus do të duhet të kalojë përmes hapësirës ajrore të së paku një vendi tjetër anëtar të BE-së. Të gjitha vendet anëtare të BE-së janë pjesë e GJNP-së, përveç Hungarisë, e cila është në proces të tërheqjes nga gjykata.

Ministri bullgar, Georgiev shtoi se Bullgaria do të ishte e gatshme të lejojë fluturimin e Putinit nëse kjo ndihmon në sigurimin e paqes botërore, duke theksuar se deri tani nuk kanë marrë asnjë kërkesë zyrtare nga Rusia për këtë.