Aktuale, Lajme

Qeveria ndau 4 milionë euro, Sindikata e Minatorëve të Trepçës anulon protestën e paralajmëruar për të enjten

Posted on by Bota e Lajmeve

Pas vendimit të Qeverisë së Kosovës për ndarjen e 4 milionë eurove për subvencionimin e pagave për minatorët e Trepçës, Sindikata e Pavarur e Minatorëve të Trepçës kanë bërë të ditur se nuk do ta mbajnë protestën e thirrur për ditën e enjte.

Sipas një postimi në rrjetin social në Facebook bëhet e ditur se qëllimi i minatorëve për ekzekutimin e pagave është realizuar.

Nisur nga fakti se ditën e djeshme kemi njoftuar se do të mbajmë një protestë pran Qeverisë së Republikës së Kosovës, me qëllimin e vetëm që të kërkojmë ekzekutimin e pagave të papaguara, e duke pasur parasysh reflektimin e qeverisë, ne tërhiqemi nga protesta e cila do të ndodhte nesër.

Tutje në postim thuhet se minatorët nuk kanë kërkuar dhe nuk kërkojnë asgjë tjetër, përveç kushte për punë dhe paga dinjitoze.

“Përkushtimi ynë për punë në minierë është dhe do të mbetet përherë i palëkundur. Prandaj lusim të gjithë minatorët t’i kthehen punës”.