​Trump rrit tarifat ndaj Kinës në 145 për qind

Tarifat që aplikohen aktualisht nga SHBA për produktet kineze do të jenë 145%, ka konfirmuar Shtëpia e Bardhë.

Dje, Trump njoftoi një rritje të tarifave në 125%, por tani është sqaruar se kjo shumë nuk përfshin tarifën tashmë ekzistuese prej 20%, e cila shtohet shtesë.

Kjo do të thotë se tarifa totale është dukshëm më e lartë se sa mendohej më parë.

Donald Trump tha në fillim të mbledhjes së tij të kabinetit se “gjërat po shkojnë shumë mirë” dhe se ai ishte “shumë i kënaqur me mënyrën se si po funksionon vendi”. Ai tha gjithashtu se dje ishte “dita më e madhe në histori” për bursat.

“Sigurisht që do të ketë kosto dhe probleme në periudhën e tranzicionit, por në fund do të jetë diçka e mrekullueshme. Ne po bëjmë atë që duhet të kishim bërë shumë vite më parë. Ne kemi lejuar që gjërat të dalin jashtë kontrollit dhe disa vende të bëhen të pasura dhe të fuqishme në kurrizin tonë. Nuk do ta lejoj këtë”, tha ai.

Trump mbajti një takim të kabinetit në Shtëpinë e Bardhë dhe vlerësoi ministrat e tij.

“Të gjithë në këtë tryezë po bëjnë një punë jashtëzakonisht të mirë,” tha ai.

Më pas fjalën e mori sekretari amerikan i tregtisë, Howard Lutnick, i cili foli për vendet që tani duan të negociojnë me SHBA-në për heqjen e tarifave.

“Nuk e di nëse do të kishim edhe orë të mjaftueshme në ditë për të folur me të gjithë ata, sepse të gjithë duan të flasin – dhe duan të flasin tani. Ata po bëjnë oferta që nuk do t’i kishin bërë kurrë më parë”, tha Lutnick.